Обнова на Офицерскиот дом

Бурмали џамија ја исфрли Градска куќа од плоштадот

Додека Исламската верска заедница бара реизградба на урнатата Бурмали џамија на плоштадот, градоначалникот Коце Трајановски бара нови локации за седиштето на градската власт

По барањето на Исламската верска заедница (ИВЗ) за денационализација на локацијата на плоштад Македонија за возобновување на Бурмали џамијата, неизвесна е изградбата на Градска куќа. Таа требаше да се гради на местото на урнатиот Офицерски дом, како негова реплика, односно на истото место каде што до дваесеттите години на минатиот век се наоѓала и џамијата. По последните искрења во јавноста меѓу ИВЗ и Владата, кои произлегоа од најавата за изградба на црква на плоштадот, се' поголем е впечатокот дека сите институции што ја најавуваа изградбата на Градската куќа, па дури и нарачаа проект, како да „атерираат“ во однос на оваа идеја. Сомневањата дека Градската куќа ќе остане само проект на хартија се зголемија и со написите во некои медиуми дека премиерот Никола Груевски не се противи на идејата за возобновување на џамијата. Неизвесноста стана поголема, откако градоначалникот Коце Трајановски на последната седница на Советот на Град Скопје рече дека од првиот ден на мандатот размислува за изборот на најсоодветна локација за Градска куќа. Тој во игра ја стави и онаа на Илинденска, каде што веќе неколку децении се наоѓаат градските бараки, но, не ја спомена локацијата на плоштадот.

- Сегашната локација каде што се наоѓаат бараките не е најсоодветна. Најблиска автобуска линија е онаа на булеварот Партизански одреди, што значи дека сообраќајно нема да биде добра како за вработените, така и за странките - изјави Трајановски.Неделчо Крстевски, раководител на Одделението за односи со јавност, тврди дека локацијата на плоштадот како идеја не е напуштена. Тој рече дека во моментов градската гарнитура е фокусирана на финансиската конструкција за изградбата, а локацијата ќе се избира потоа.

- Претпазливоста околу локацијата е поради тоа што треба да се изгради зграда која би ја собрала целата градска администрација, а воедно во тој објект треба да има и резиденцијален дел. Тој нема да се користи за живеење, туку само за официјални приеми - вели Крстевски.Најавите за обнова на Офицерскиот дом како Градска куќа беше издигната на сериозно ниво пред три години, кога Министерството за култура распиша конкурс за идеен проект за објектот. По изборот на првата награда, проектот беше на доработка, со објаснување дека предлогот на авторот не соодветствува доволно со намената што треба да ја има објектот, како седиште на градската власт. Според финалниот проект задржана е целата архитектура на Офицерскиот дом, со таа разлика што горе е предвидена стаклена купола. Во рамките на Градската куќа беше планирана и матична сала за венчавки. Од Министерството за култура не кажаа дали и кога ќе ја финансираат изградбата, само изјавија дека проектот сега се наоѓа во Министерството за транспорт и врски.

- Министерството за култура, во однос на изградбата на Градска куќа, имаше обврска да распише меѓународен конкурс за идејно архитектонско-урбанистичко решение за објектот, на локација на градскиот плоштад. Беше избран проектот на професор Коста Мангаровски. Проектот е предаден на понатамошна доработка во Министерството за транспорт и врски - изјави портпаролот Анита Јованоска. Од Министерството за транспорт потврдија дека проектот е кај нив, поради тоа што пред три месеци распишаа конкурс за идејно решение за изградба на хотел со пет ѕвезди на плоштадот и тоа во рамките на комплексот Градска куќа.

- Според деталниот урбанистички план за Мал ринг на плоштадот во рамките на шест парцели е предвидена изградба на комплекс во кој се предвидени повеќе содржини. Едниот дел ќе биде Градска куќа, а другиот - хотел - изјавија тогаш од Министерството за транспорт.

Тогаш најавија и дека голем дел од земјиштето на овој простор е државно и дека ќе го отуѓуваат по изборите, но досега не е распишан конкурс за продажба. Изминативе години во јавноста имаше уште неколку идеи за локации за Градска куќа, и тоа во објектот на Старата железничка станица, на „Илинденска“, како и зад Општина Центар, односно на слободното земјиште на Министерството за одбрана.

http://www.dnevnik.com.mk/?ItemID=A2A86EADE069514A840309C37C49CD70