Паркирање и паркинзи (општо)

Паркирањето во Клинички под капа на Градот

„Градски паркинг“ в петок ќе го преземе стопанисувањето од фирмата „Венекс“, која во изминатите шест години управуваше со паркингот

ДЕСПИНА ТРАЈКОВСКА



Паркингот на Клинички центар од утре ќе биде под градска надлежност. Со владина одлука, неодамна е раскинат договорот со фирмата „Венекс“, која во изминатите шест години управуваше со паркингот. Така, претпријатието „Градски паркинг“, конечно, ќе го добие паркингот, кој според надлежните таму во изминатите шест години бил неосновано под приватна контрола.

Од претпријатието уверуваат дека наскоро паркирањето во Клинички ќе биде поорганизирано, дури можеби и поевтино од досега, се' со цел на посетителите да им се овозможи непречено и безбедно паркирање. 

Надлежните веќе вршат анализа на терен за да утврдат дали паркирањето ќе биде како досега само како затворен тип паркиралиште или ќе се воведе и зонско паркирање. Се разгледува и можноста во рамки на клиниките да се зголеми и капацитетот за паркирање со монтажен паркинг. 

„Периодов се прават потребните испитувања на теренот. Се разгледуваат сите опции за начинот на паркирање за тоа да се изведе максимално во интерес на пациентите. Приоритет ќе ни биде решавање на долгогодишниот проблем со паркирањето при самиот влез на клиниките, а за кој тие што стопанисуваа со паркингот очигледно немаа слух. Одговорно тврдам дека во изминатите години паркингот функционираше полошо отколку кога паркирањето никој не го регулираше. Ние сме убедени дека за кратко време ќе овозможиме брз проток на возилата на Итна помош, на пациентите што имаат потреба од брзи интервенции и на сите посетители на Клиничкиот центар“, вели Панче Стојановски, заменик-директор во „Градски паркинг“.

Тој појаснува дека наскоро ќе биде утврдена и ценовната политика, а сега во прво време таа ќе биде преземена од досегашниот стопанисувач со паркингот. Стојановски не ја исклучува можноста да се воведат два начина на наплата, зонско и затворен вид паркирање, како и опцијата првите 15 минути да бидат бесплатни за граѓаните да можат само да ги остават пациентите и да заминат.

Надлежните најавуваат дека плановите ќе се реализираат етапно, а процениле дека за нивна реализација ќе им бидат потребни околу 500.000 евра. „На овој паркинг во изминатите години ништо не е инвестирано. Освен неколку квадрати бехатон-плочки и неопходните рампи, на паркиралиштата нема други инвестиции“, вели Стојановски и дополнува дека е договорено парите од профитот да ги делат со Градот и со Министерството за здравство.