Трговски објекти (општо)

„Туш“ и „Певец“ внесоа европски дух во пазарењето

„Туш“ е наклонет кон соработка со локалните доставувачи и се труди да ја зголеми понудата и асортиманот на домашните производители

Со нивното присуство се зголемува изборот на купувачите, а конкуренцијата овозможува и намалување на цените

Александрија Стевковска

Влезот на словенечки „Туш“ и на хрватски „Певец“ на македонскиот пазар преку отварање нивни маркети во Штип, Куманово и во Гостивар внесе свежина на пазарот и конкуренција, која недостигаше во овој сектор. Европскиот дух на пазарење што владее во овие нови маркети накратко ги пренесува купувачите во димензија на современо купување, кое тргнува од начелото на почитување на желбите и потребите на купувачите. Сепак, најважно од се' е што со нивното присуство во земјава и најави за отворање нови маркети се зголемува изборот на купувачите и се создаваат услови за зголемување на конкуренцијата, која овозможува и намалување на цените, но и релаксирање на македонското производство, со оглед на тоа дека во маркетите се пласираат и македонски производи.

„Деловното работењето на групацијата ’Туш‘ го следи интензивен растеж, кој може да се илустрира преку отворање на двата супермаркета во Македонија, и тоа во Штип и во Куманово“, вели Јернеј Мурн, директор на „Туш“ - Македонија. Оттаму велат дека се' уште е рано да се даде оцена за двомесечното работење на штипскиот супермаркет, но првите впечатоци се добри.

„Певец“ планира отворање нов, најголем и најлуксузен продажен центар, кој треба да биде лоциран во скопското село Чучер - Сандево, продажниот салон во Гостивар

„Купувачите се задоволни, бидејќи го имаат добиено она што и го очекувале, а најмногу релаксирано пазарење, одмор и уживање, со оглед на тоа дека во состав на супермаркетите има банки, аптеки, мобилни оператори, угостителски локали. Инаку, со инвестиции на македонскиот пазар ќе продолжиме и во иднина. Подготовките за градење се во тек во Скопје, Битола, Гевгелија и Струмица, а во наредните пет години имаме намера во сите поголеми места во Македонија да изградиме вкупно 20 супермаркети на „Туш“, кои ќе бидат изградени по мерка на најпребирливите купувачи. Вредноста на нашите инвестиции на странските пазари само во текот на оваа година изнесува повеќе од 60 милиони евра, а од тоа на македонскиот пазар ќе се насочат 10 милиони евра“, вели Мурн.

Од „Туш“ информираат дека се наклонети кон соработка со локалните доставувачи, така што се трудат да го зголемат односот помеѓу македонските и увозните производи во нивните супермаркети во Македонија во корист на домашните производители. Засега тој однос е 60:40 во корист на странските производители. Инвестицијата во Штип вреди 2,6 милиони евра, а во кумановскиот супермаркет се вложени 2,7 милиони евра.

Во Гостивар, пак, свој продажен центар отвори хрватската групација „Певец“. Во него може да се купат производи за домаќинство, алати, градинарство. Во овој продажен центар во Македонија се вложени 3 милиони евра и со неговото отворање официјално започна влезот на македонскиот пазар на еден од водечките хрватски трговски синџири.

„Певец“ во Гостивар е 15. продажен центар на групацијата и прв надвор од границите на Хрватска, со чие отворање започнува регионалната експанзија на оваа успешна хрватска компанија. Оттаму велат дека нивниот влез на македонскиот пазар значи зголемување на конкуренцијата и изборот што им се нуди на потрошувачите.

Следната инвестиција е отворање нов, најголем и најлуксузен продажен центар на оваа компанија воопшто досега направен, кој треба да биде лоциран во скопското село Чучер - Сандево. Наредното што стои во развојниот план на „Певец“ е отворање маркети во Тетово, Куманово, Велес и во Струмица. „Иако помина кратко време од отворањето на нашиот центар во Гостивар, задоволни сме од неговото работење со оглед на тоа дека нема сличен трговски синџир во Македонија. Забележавме дека потрошувачите се' уште ги испитуваат цените и асортиманот и веруваме дека за кратко време ќе се запознаат со погодностите на сите наши акции и понуди и дека ќе ја стекнеме нивната доверба“, вели Крунослава Блаха, портпаролка на „Певец“.