Бензински пумпи

Во трка по клиенти бензинските станици го подобруваат квалитетот на услугите. ОКТА ребрендираше пумпи за подобар имиџ, „Лукоил“ отвораше маркети, а „Макпетрол“ во партнерство со познатиот угостител Љупчо Николовски Фуфо, пицерии.

Станува збор за ланец пицерии под брендот на „Фуфо“. Првата е на реновираната бензинска на „Макпетрол“.

„Денеска го отворивме првото, или првенчето, како пилот варијанта која се надевам, дека ќе биде многу успешна и се надеваме дека во наредните две-три години да отвориме 30-тина“, изјави Љупчо Николовски, сопственик на „Дал Фуфо“.

Планирано е пицерии под брендот на „Фуфо“ на бензинските на „Макпетрол“ да има низ цела Македонија.

„Верувам дека на овој начин, овој модел што го направивме заедно со „Макпетрол“ ќе делуваме позитивно на туризмот во Македонија, затоа што сите што се бават со туризам во Македонија знаат дека покрај другото, туризмот има една гранка која се вика транзитен туризам. Ние до овој момент во Македонија не можевме да пренесеме или да им понудиме на гостите транзитен туризам, затоа што ниеден гостин што ќе влезеше, на неговото транзитно патување немаше каде да застане“, рече Николовски.

Речиси во сите земји во регионот вакви угостителски капацитети одамна постојат. Во Македонија „Макпетрол“ поседува најголем број на бензински станици. Со помал број објекти му конкурираат ОКТА И „Лукоил“.