Обнова на Офицерскиот дом

ОФИЦЕРСКИ ДОМ НЕМА ДА биде обновен ГОДИНАВА

Заглави изградбата на Градска куќа

Од Министерството за култура велат дека чекаат да заврши процесот за денационализација на мала соседна парцела, по што ќе почне изградбата

Проектот за обнова на Офицерскиот дом е готов, но никој годинава не предвидел пари за почеток на изградбата. Во буџетот на Министерството за култура нема ставка со доволно средства за воскреснување на репликата на овој објект, кој беше оштетен, а потоа урнат по земјотресот во 1963 година.  Предвидени се само два милиона денари, односно 32.000 евра. Новиот Офицерски дом, како што најави Владата, треба да биде Градска куќа, односно седиште на градската администрација, која со децении работи во бараки на „Илинденска“, кај Градски парк. Како можен датум за почеток на изградбата беше најавен ланскиот септември, но работите заглавија. Од Министерството за култура не велат дека немаат пари, туку дека целата работа заглавила кај денационализација на соседна парцела. Останаа куси за одговор до каде е предметот и дали скоро ќе заврши, а не објаснија ниту дали денационализацијата ја зафаќа и парцелата на која треба да се гради Градската куќа. Александар Ѓорѓиевски, советник за односи со јавност во Министерството изјави дека проектот според кој треба да се гради е приспособен по забелешките што лани му беа дадени на авторот.

- Сега во Министерството за финансии се решава сопственоста на мала парцела во постапка за денационализација. Изградбата ќе почне по завршувањето на постапката - кажа Ѓорѓиевски.

Проектот за изградба на Градската куќа на плоштадот Македонија лани по јавниот конкурс му беше вратен на доработка на професорот Коста Мангаровски. Објаснувањето беше дека неговиот предлог не соодветствувал доволно со намената што треба да ја има објектот, како седиште на градските власти. На конкурсот не беше доделена прва награда, затоа што Комисијата што ги разгледуваше осумте проекти оценила дека ниту еден предлог не ги задоволува барањата за автентичност и за функционалност на објектот. За проектот на Мангаровски беше кажано дека е најдобро решение кое потсетува на стариот Офицерски дом. Идејата за изградба на нова Градска куќа потекнува уште од 1966 година, кога бил распишан и првиот меѓународен конкурс. Имало првонаграден труд, но до реализација не дошло, бидејќи Градската куќа не влегла во шесте капитални објекти за кои политичките власти во тоа време сметале дека треба да се градат. Првонаградениот труд предвидувал репрезентативно здание на плоштадот Македонија. Оттогаш биле распишани уште неколку конкурси, а имаше идеја Градската куќа да се смести во објектот на Старата железничка, кој требаше да биде обновен за таа намена. Во новата Градска куќа освен кабинетот на градоначалникот на Скопје и дел од градската администрација, предвидена е и матична сала за венчавање и други содржини.

Јорданка Ивановска