Економски вести

Владата ги покачи пензиите

Зголемувањето на пензиите во просек од 15 отсто е најголемо досега, нагласи премиерот  Никола Груевски

Пензионерите од 1 јануари ќе добиваат повисоки пензии, одлучи Владата вчера. Покачувањето - во просек од 15 отсто - е најголемо кај најниските пензии.Пензионерите што примаат 6.000 денари ќе добијат покачување од 20 отсто, 15 проценти за тие од втората група, односно за пензии до 10.800 денари, 12 отсто за пензии до 15.000 денари и 10 отсто покачување на пензии над 15.000 денари. Јануарската пензија нема да биде покачена во најавениот процент, туку скратена за 3 отсто. Значи, во февруари пензионерите од првата група ќе добијат покачување од 17, од втората 12, од третата 9 и од последната група 7 отсто. Целосно покачени пензии ќе се исплаќаат од јули, кога пензионерите ќе ги добијат и сега „скратените“ три проценти.

Во јули пензионерите ќе добијат и евентуално ново покачување, зашто според усвоените законски измени пензиите треба да го следат порастот на платите и на трошоците за живот.

- Направивме дополнителни детаљни анализи и пресметки и тие покажуваат дека во наредниот период од пет полугодија, односно две и пол години пензиите ќе бидат зголемени од 20 до 30 проценти, сообразно со висината на пензијата. Сегашното покачување е најголемо досега - рече премиерот Никола Груевски.

Вицепремиерот Зоран Ставревски напомена дека, ако не беше вчерашната владина одлука, пензионерите годинава ќе можеа да добијат покачување на пензиите од само 6 отсто. Тој потсети дека во последните четири години вкупниот пораст на пензиите изнесуваше само 6 отсто. А ако се има предвид дека во овој период престана исплатата на „укинатите“ 8 проценти, пензиите практично се намалуваа, наспроти порастот на платите од 21 отсто.

- Со ова покачување од 15 отсто во просек, ние го компензираме одеднаш сето тоа, односно порастот на пензиите го усогласуваме со порастот на платите - рече Ставревски.

Покачувањето на пензиите, според министерот за труд и социјална политика Љупчо Мешков, е за подобрување на материјалната и социјалната состојба на корисниците на пензија.

- Најниската сегашна пензија, која изнесува 4.091 денар, на крајот од годинава ќе достигне ниво од 4.970 денари, што е значајно за оваа категорија пензионери. Со ова паѓаат во вода скептичните предвидувања дека пензиите не може да бидат покачени за повеќе од три отсто - рече тој.

Вчерашниот дневен ред на владината седница, на барање од министерот за надворешни работи Антонио Милошоски, беше проширен со иницијативата за отворање канцеларии за врски во Израел - Тел Авив и во Индија - Њу Делхи.

Предраг Димитровски

Овде му е местото.

ПОЧНА ИСПОРАКАТА НА ПРЕПАРАТИ СО ЕДИНСТВЕНИ И ПОНИСКИ ЦЕНИ

Јануари треба да ги испие скапите лекови

Не очекуваме застој во снабдувањето на аптеките, а најдобро е фабриките да ги печатат цените на пакувањето ,вели директорот на Бирото за лекови, Илчо Захариев

Сите лекови што се испорачуваат во аптеките од вчера имаат единствени цени, одобрени од Бирото за лекови. Во ниедна аптека не смеат да се примаат лекови без наведена цена на кутијата, што е во согласност со новиот Закон за лековите, рече вчера директорот на Бирото, Илчо Захариев. Цените на многу лекови ќе бидат пониски од постојните, а препаратите во сите аптеки во земјата од 1 февруари ќе мора да се продаваат по исти цени. Лековите ќе може да се продаваат по единствените цени дури откако аптеките ќе ги потрошат резервите од препарати, кои сега се со повисоки цени. Аптеките имаат преоден рок од 30 дена за да ги потрошат старите резерви на лекови, но тие што пред тоа ќе се ослободат од нив, веднаш ќе може да ги продаваат лековите по нови, пониски цени.

Инспекторите на Бирото за лекови, по направената контрола кај производителите на лекови и кај веледрогериите, оцениле дека дел од нив ги печатат цените на лековите на бандеролите, а останатите ги печатат на самите кутии.

- Имаше 14 жалби на одлуката за воведување единствени цени, но таа стана правосилна и почнавме да ја спроведуваме. Се работи интензивно, а најголемите производители на лекови во земјата, како „Алкалоид“ и „Реплек“, се сосема подготвени за новата одлука, а и во „Јака“ веќе ги лепат бандеролите. И сите веледрогерии се подготвени и добро организирани, па не би требало да има застој во снабдувањето со лекови - изјави Захариев.

Бирото за лекови ги известило аптеките дека тие не смеат да порачуваат нови количества од некој лек се' додека не ја потрошат постојната резерва лекови во аптеките што ги набавиле пред да почне да важи Одлуката за единствените цени.

- Досега резервите лекови се трошеа за 15 до 30 дена, затоа и го определивме 1 февруари како краен рок. Не очекуваме застој во испораката на лекови во аптеките поради единствените цени, а најдобро е фабриките да ги печатат цените на кутиите со лекови - објаснува Захариев.

Бирото за лекови, во соработка со Управата за јавни приходи и Царината, вршат контрола на спроведувањето на оваа одлука.

Казните за непочитување на единствените цени на лековите се ригорозни. Казна од 25.000 до 50.000 евра ќе добие аптеката и веледрогеријата што нема да продава лек по овие цени. Освен тоа, на аптеката, односно веледрогеријата може да и' биде привремено или трајно одземена дозволата за работа ако не се придржува кон одлуката.

Љубица Балабан