Образовни институции (општо)

Напролет нов простор за Уметничко

Околу 200 ученици од Средното уметничко училиште „Лазар Личеновски“ само уште ова полугодие ќе се туткаат во мал број простории, а напролет ќе може да се преселат во новиот објект, откако Министерството за образование и наука најави дека изградбата на зградата ќе продолжи за еден месец, а ќе биде готова за почетокот на второто полугодие.

- Во изработка е основниот проект на училиштето, кој за една недела треба да се одобри, а за еден месец треба да почнат градежните работи на новиот објект. Се планира училиштето да биде готово за четири месеци - велат од Министерството. Оттаму додаваат дека дел од учениците, како и во минатата учебна година, додека се доизгради објектот ќе бидат префрлени во некое од училиштата во непосредна близина, каде што наставата се одржува во една смена.

Новиот објект ќе има приземје и кат. Приземјето ќе биде со површина од 935 квадратни метри, а во него ќе има седум училници-работилници. Катот ќе биде со површина од 1.006 квадратни метри и во него ќе има осум училници-работилници. Проектот чини 36 милиони денари, кои ќе ги обезбеди Министерството за образование.

Изградбата на овој објект почна во ноември лани, но само за неколку дена беше прекината бидејќи имаше проблем со Детаљниот урбанистички план на Општина Центар зашто во него не беше внесена маркичката за новиот објект. Дека тоа е надминато, потврдува и Центар.

- Во ДУП „Буњаковец 1“, донесен во 2005 година, дел од постојниот објект на училиштето не беше потврден. Неусогласувањето е надминато со одобрување нова планска документација. Постапката за издавање одобрение за градба е во завршна фаза - информираат од Центар.

Засега, во функција на ова училиште, изградено во 1946 година, се два објекта, од кои едниот е реконструиран пред две години, а другиот пред околу седум години. Недостига третиот објект, на чие место во ноември лани почна изградбата на нов објект. Поради тоа, учениците дел од минатата учебна година мораа да ја поминат во несоодветни услови и со несоодветен распоред на часови.

Директорот на училиштето, Ицко Петрески, вели дека проблемот ќе се реши.

- Директорката на ОУ „Песталоци“ ни одобри користење на една мала просторија, доволна за пет ученици, но тоа се покажа како неефикасно зашто нашата настава е комплексна, со реквизити, штафелаи, големи работни маси - објасни Петрески.