Градот Скопје за првпат почнува со ноќно бележење на хоризонталната сигнализација на градските улици. Наредните денови ќе се бележат улиците во централното градско подрачје и тоа во периодот од 22 часот до 05 часот наутро, поради намалената фреквенција во сообраќајот.

На 18 јуни ќе се бележат улиците 11 Октомври и Димитрие Чуповски. На 19 јуни ќе се бележи улицата Мито Хаџивасилев Јасмин. На 21 јуни на ред ќе биде булеварот Свети Климент Охридски.

Од 22  до 26  ќе се бележат улиците Даме Груев и Васил Аџиларски, крстосницата меѓу булеварот Кочо Рацин и улицата 11 Октомври,  Железничка и булеварот Водњанска.

Семафорите кај „Мекдоналдс“ во Аеродром и на приклучокот на улицата Владимир Комаров кон булеварот Јане Сандански веќе неколку дена не работат или се вклучени само во дел од денот. Поради тоа, на овие точки чест е застојот на возилата, многупати само на среќа се избегнуваат сообраќајни несреќи, а нервозните возачи се пречекуваат со свирежи и со пцости. Тешка несреќа со осум повредени, меѓу кои и две деца, се случи минатиот месец на крстосницата кај „Мекдоналдс“, а и тогаш граѓаните тврдеа дека семафорите не работеле. - Живеам во Аеродром и секој ден ги минувам овие локации, а ваква негрижа досега не сум видел. Ако треба ние да ги известуваме властите дека некој семафор не работи, тогаш алал нека им е работата. Во секој нормален град се интервенира брзо за да нема сообраќајни несреќи секој ден, само кај нас се спие “ реагира жител на населбата. Од Општина Аеродром велат дека се запознаени со проблемот со расипаните семафори и испратиле допис до надлежните од Градот зашто тие се одговорни за семафоризацијата. Градските власти не знаеја точно да одговорат дали се работи за дефект на семафорите или тие намерно се исклучени, туку дадоа само општ одговор дека постојано ја следеле состојбата на терен. - Нашите екипи секојдневно вршат обиколка на подрачјето на градот за да ја проверат вертикалната сигнализација во која спаѓаат и семафорите. Во случај на проблем или неработење на некој семафор, гледаме на што побрз начин да го надминеме “ велат од Град Скопје. Ова не е единствен проблем со семафорите зашто на некои локации тие се уште не работат, а на други крстосници се чека допрва да се постават. Таков е случајот со семафорите на улицата за влез кон супермаркетот „Веро“ во Тафталиџе, кои Град Скопје ги постави неодамна. Властите велат дека тие ќе се пуштат во употреба наскоро, откако ќе завршат работите за поврзувањето и синхронизацијата со семафорите на крстосницата на улицата Теодосиј Гологанов и булеварот 8 Септември. Сигнализација се уште не доби ниту крстосницата на Никола Тесла и Орце Николов, кај Машински факултет. Општина Карпош со месеци најавува дека ќе постави семафори, и тоа не обични, туку соларни, но граѓаните велат дека ќе бидат задоволни со какви било семафори, само да се спречат честите сообраќајни несреќи и децата безбедно да поминуваат улица.

Екипите ангажирани од Град Скопје, вчера започнаа со рачно обележување на пешачките премини и црвените ленти за велосипедистите на булеварите "Јане Сандански" и "Кузман Јосифовски Питу".

Со завршувањето на рачно обележување, ќе се продолжи и со машинското обележување на подолжните линии по сообраќајниците кои се во надлежност на Градот Скопје, со што ќе бидат опфатени коловозните ленти, пешачките острови, лентите за движење на автобусите од јавниот превоз и другата хоризонтална сигнализација соопштуваат градските власти. Само во општина Аеродром, рачно ќе бидат обележани повеќе од 2.000 квадратни метри, додека машинско бележење ќе се изврши на околу 4.000 квадратни метри. По заршување со обележување на хоризонталната сигнализација во општината Аеродром, околу 25 мај, работите ќе продолжат во Малиот и Големиот ринг на централното градско подрачје.