Економски вести

Украинскиот тајкун Тарута влегува во „Бетон“?

Овој милијардер треба да биде избран за член на новиот УО на градежната компанија

Сергеј Тарута 

НИНА НИНЕСКА-ФИДАНОСКА

Сергеј Тарута, украински мултимилијардер, влегува во скопски „Бетон“. Богатиот бизнисмен денес треба да биде избран за член на УО на оваа компанија. Информацијата вчера не сакаа да ја потврдат, ниту да ја демантираат официјални извори. Неофицијалн, во предлог-одлуката за утрешното годишно Акционерско собрание е најавено дека Тарута ќе биде изгласан за член на новиот УО на „Бетон“.

Вчера низ бизнис-круговите проструија многу шпекулации на оваа тема. Одредени извори тврдат дека Тарута е заинтересиран за купување на „Бетон“, при што би купил дел од акциите на компанијата „Репро уан лимитед“, зад која стои македонскиот бизнисмен Минчо Јорданов, која инаку моментално има пакет од 24,51 отсто, а дел од други помали акционери. Други кругови, пак, велат дека Тарута засега настапува во компанијата како нејзин „деловен пријател и партнер“.

Во текот на вчерашниот ден различни беа и информациите околу тоа кога овој украински тајкун би требало да допатува во земјава и тоа со својот приватен авион. Така, првите вести беа дека тој ќе дојде во Македонија уште денес, да присуствува на своето назначување како член на УО. Потоа неговата посета беше под знак прашање, наводно, поради магла во Украина. Одредени извори дури и тврдеа дека тој денес сигурно нема да дојде во Македонија, но дека е можно да пристигне најдоцна до четврток или в петок, кога треба да се одржи 60-годишен јубилеј на компанијата.

Бизнис-магазинот „Форбс“ неговото богатство го процени на 2 милијарди долари, со што тој е меѓу педесетте најбогати луѓе на светот. Тарута, кој има 48 години, е претседател на Бордот директори на холдингот „Индустриски сојуз на Донбас“, во кој спаѓаат повеќе металуршки комбинати, а Тарута е еден од двајцата сопственици. Корпорацијата во 2006 имала обрт од 5,2 милијарди американски долари.

Порталот „Нетпрес“, пак, вчера објави дека Тарута влегува во „Бетон“, бидејќи оваа компанија ќе биде дел од конзорциумот што ќе го гради олимпискиот град Сочи во Русија, каде што ќе се одржат следните зимски Олимписки игри. Финансиска поддршка за овој огромен проект „Бетон“ требало да добие и од британската Ројал банк. Покрај Тарута, во новиот УО на „Бетон“ ќе бидат Гари Парфет, претставник на Ројал банк од Велика Британија, Минчо Јорданов, претседател на УО на „Макстил“ (за кого исто така се тврди дека денес нема да присуствува на Собранието), Мино Дамјановски, македонски бизнисмен, Златко Јанакиевски, досегашниот генерален директор, и Трајко Трпески, негов заменик.

Само од разликата на повисоката цена на јаболката во пролет инвестицијата може да се врати уште во првата година.