Училишните дворови на постојан распуст

Училишните дворови одамна се заборавени од надлежните, а учениците се' помалку ги користат во наставата, како што беше случајот пред повеќе генерации.

Повеќето личат на запустени ничии ливади, обраснати со трева и грмушки, полни со ѓубре, употребени шприцови, кондоми и друг прибор кому не му е местото во близина на деца. Родителите на основците се загрижени за безбедноста на нивните деца, особено што поголем дел од дворовите не се оградени, па таму може да влезе кој сака и кога сака. Градоначалниците се оградуваат од проблемот со образложението дека уредувањето на дворовите е обврска на училиштата, кои се жалат дека вандали редовно им ја уништуваат опремата.

Родителите се незадоволни што нивните деца не ги користат училишните дворови во наставата, како што правеле тие кога учеле. Велат дека најубавите часови им биле од таканаречаната настава во природа, која се одржуваше во дворовите, кои во тоа време, секогаш биле уредени и искосени.

- На игралиштата се правеа големите акции за собирање на стара хартија или стакло. Во некои училишта имаше дури и сообраќајни полигони на кои децата учеа како се вози велосипед и ги совладуваа првите сообраќајни правила. Во училишните дворови „паѓаа“ и првите бакнежи, а денес првите дози дроги, тепачки и кражби. Училишните дворови денес се или обраснати со треви или преполни со бетон, без коренче зеленило, а тоа на учениците секако не им дозволува никакво чувство на слобода - велат родители.

Општина Центар се грижи за седум основни училишта, од кои најмалку пет се лош пример за тоа како треба да изгледа училишен двор. Дворот на „Јохан Хајнрих Песталоци“ речиси нема агол што е уреден, а истата судбина ја делат и училиштата „Димитар Миладинов“, „Кочо Рацин“ и „11 Октомври“.

Родителите чии деца учат во „Ј.Х. Песталоци“ велат дека се загрижени за нивната безбедност оти во дворот секојдневно минуваат граѓани кои немаат никакви обврски во училишто.

- Зарем никој од општината не гледа дека ова е казна за децата? Децата треба да ги минат одморите во дворот, каде треба да се рекреираат или забавуваат. Но, нема дрво, нема сенка, дворот е со искршен бетон без ниту едно цвеќе. Таков е со години, кој сака влегува и излегува, оти има два влеза и служи како улица - вели една револтирана мајка.

Од Општина Центар велат дека наскоро во дел од основните училишта ќе постават клупи, корпи за отпадоци, детски реквизити и партерно уредување.

- Не постои правилник за тоа како треба да се уредуваат училишните дворови. Што се однесува до хигената во училиштата, комуналните инспектори не може да казнуваат, може само да ги опоменат службите во училиштето, бидејќи дворот не е јавна прометна површина. Самото училиште треба да го одржува дворот и хигиената - велат во општината.

Одговорните во основото училиште „Коле Неделковски“, пак, се жалат дека тие постојано се трудат да ги обноват клупите, корпите и зеленилото, но вандали редовно ги уништуваат. Но, во други училишта самите вработени потврдуваат дека со години ништо не се вложувало во огромните дворови.

На територијата на Општина Кисела Вода постојат осум основни и три подрачни училишта.

- Општината со свои средства, но и во соработка со неколку стопански субјекти како Цементарница и Прокредит банка во изминатиот период имаа акција за хортикултурно уредување на сите училишни дворови. Беа посадени дрвца и жива ограда. Немаме проблем со одржувањето на хигиената на дворовите, бидејќи еден дел од вработените во општина Кисела Вода, кои се задолжени за одржување на хигиената, ги одржуваат и училишните дворови. Во дворот на „Св. Климент Охридски“ постои и соодветна ботаничка градина - велат од општината.

Неодамна имаше и пример кога родители донираа пари со кои се купија реквизити за детско игралиште во „Партенија Зографски“.

Родителите чии деца учат во „Климент Охридски“ во населбата Бутел, велат дека огромниот училиштен двор е обраснат и полн со ѓубре.

- Жално е што хаосот од грмушки и треви во училишниот двор не се претвори во парк, каде што и граѓаните од околината ќе може да здивнат. За жал, во околината на училиштето нема парк, а пред наши очи пропаѓа прекрасна природна средина. Нема ни елеменарно чистење на дворот. Од грмушките се хранат и кози и овци. Тоа за децата баш и не е средина во која уживаат - вели скопјанката Наташа П.

Директорката на училиштето смета дека нивниот училиштен двор изгледа добро и додава дека е во тек негово доуредување. Таа не се согласува со забелешките на родителите.

Родителите остануваат на својот став дека дворовите не се достојни за учениците и бараат општините повеќе да се заангажираат за проблемот. Тие стравуваат и дека ако самиот кадар во училиштата е незаинтересиран за околината, и нивните деца во иднина нема да знаат како да се однесуваат со природата и околината.

Студентски бараки за резил