Сообраќајна сигнализација и информативни табли

Екипите на ЈП Улици и патиштаа, во согласност со програмата на Град Скопје, почнаа да поставуваат нови семафорски одбројувачи на уште неколку крстосници во градот.

Во тек се активностите за поставување одбројувачи на булеварот Партизански одреди на повеќе локации. Одбројувачи се поставени на крстосницата со улицата Московска и со булеварот 8 Септември. Вчера се поставуваа одбројувачи на крстосницата меѓу булеварите Партизански одреди и Ѓорче Петров и меѓу Партизански одреди и улицата Рузвелтова. Одбројувачите кои се поставуваат на семафорите се од италијанско производство и со својот квалитет на возачите ќе им овозможат непречено да го координираат движењето на крстосниците, со што ќе се подобри безбедноста на пешаците и проточноста на сообраќајот. Одбројувачите кои се поставуваат на булеварот Партизански одреди се плод на добрата соработка меѓу Градот Скопје и Републичкиот совет за безбедност во сообраќајот, која резултира со донација од 40 нови одбројувачи.
Од оваа донација, 18 одбројувачи се веќе поставени, осум се поставуваат, а до крајот на акцијата уште три крстосници ќе добијат нови одбројувачи на семафорите.

Зелениот бран на раскрсниците не функционира

По секое исклучување, семафорите го губат континуитетот со тие на другите раскрсници, поврзани во зелениот бран

Сања Наумовска

Зелениот бран на семафорите во Скопје ретко каде функционира, коментираат возачите. Најчесто тоа се случува во центарот на градот, каде семафорите на најфреквентните раскрсници речиси секојдневно се исклучуваат. Без разлика дали причината се шпиц-гужвите или, пак, поминувањето на автомобилите со придружба кога сообраќајот го регулира сообраќајната полиција, по секое исклучување семафорите го губат континуитетот со оние на другите раскрсници поврзани во зелениот бран.

Од страна на Градот Скопје ваквата состојба се оправдува со фактот дека на некои делници контролорите на семафорите не се поврзани. Поради тоа, ако сообраќајната полиција ги исклучи семафорите, при повторното вклучување тие не работат во истата фаза како и претходно. Екипите на Јавното претпријатие „Улици и патишта“ овој проблем го решаваат секојдневно, на лице место го усогласуваат времето на сите семафори во зелениот бран.

„За да се избегне ваквата состојба, Градот веќе работи на трајно решавање на овој проблем, за што е распишана постапка за набавка на 30 нови контролори за семафорите. Исто така, во фаза на подготовка е и тендерската документација за распишување тендер за набавка на оптички кабел, со кој семафорите со контролори ќе се поврзат меѓусебно и ќе работат координирано, без разлика дали и кога ќе бидат исклучувани“, велат надлежните во Градот.

Новите контролори се наменети за раскрсниците на кои веќе е воспоставен зелениот бран. Во центарот на четири раскрсници на булеварот „Свети Климент Охридски“, потоа на девет раскрсници на булеварите „Јане Сандански“ и „Кузман Јосифовски-Питу“, на „Партизански одреди“ во зелен бран се поврзани единаесет раскрсници, а на улицата „11 Октомври“ четири раскрсници.

Во иднина, информираат градските власти, планирано е зелен бран да има и на Јужен булевар, на улицата „Првомајска“, на булеварот „Србија“, како и од Скопски саем до Соборниот храм. Со тоа, велат во Градот, ќе се координира работата на семафорите и дополнително ќе се придонесе за растоварување на сообраќајот и ќе се зголеми протокот на сообраќајниците.