Возен парк (ЈСП - двокатни автобуси)

Жена ќе го вози двокатниот кабриолет до Матка и Водно

На 6 септември се очекува да бидат пуштени во сообраќај 107 нови автобуси, 68 двокатни и останатите едноподни од Украина

Деспина Трајковска



Двокатниот панорамски автобус, кој е дел од пратката со 68 кинески автобуси ќе вози до туристичките места низ Скопје, а честа да седи зад воланот ќе и' припадне на Весна Најдоска, возач од ЈСП, која неодамна го освои вицешампионското место на меѓународниот натпревар во вешто возење автобуси. Автобусот ќе биде даден на користење на „ЈСП турс“ и допрва треба да се одлучи колкава ќе биде цената на билетот за туристичките тури или можеби промотивно без пари ќе вози извесен период. 

Ова се последните најави од сообраќајното претпријатие кое денеска се очекува и официјално да ги добие на користење 68-те двокатни автобуси од „Јутонг“. Освен нив, градскиот Совет и официјално ќе му ги пренесе на ЈСП и правата на користење 39 украински едноподни автобуси, кои иако со задоцнување од нецел месец, сепак, стасаа во Скопје. 

Подновениот возен парк се очекува да биде предаден во употреба на 6 септември. Новите автобуси, вкупно 107, ќе бидат избрендирани симболично со порака во чест на државниот празник 8 Септември и такви ќе возат низ Скопје цел месец. 

„Денеска на Совет, всушност, треба да заврши постапката за пренос на возилата на наше име, а во меѓувреме и ние привршуваме со процедурата за пуштање во сообраќај на автобусите истовремено и утврдување на возниот ред. Практично, на користење ќе добиеме 107 автобуси, што е од непроценливо значење за подновата на нашиот возен парк“, изјави вчера Мишо Николов, директор на ЈСП. 

Тој информираше дека промоцијата на автобусите ќе се случи два дена пред државниот јубилеј. Планирано е сефте со нив да направи државниот врв и гостите на свеченоста кои ќе се повозат до скопскиот аеродром каде што истиот ден ќе се предава во употреба новата терминална зграда на „Александар Велики“.

Нема пушење во првиот панорамски автобус

Во панорамскиот автобус нема да биде дозволено пушење, иако е со отворен покрив, а во планираните речиси идентични 15 возила дури се инсистираше да има пепелници. Од ЈСП објаснуваат дека „овој е за нијанса поразличен“ и во него нема да има пепелници, ниту, пак, опрема каква што се бара за 15-те, кои исто така се нарачани од „Јутонг“. Двокатниот кабриолет, кој наскоро ќе почне да вози низ Скопје, по потреба ќе се покрива со жолта церада, а патниците ќе можат да уживаат во панорамската глетка на градот и излетничките места во убавите сончеви денови. 

Двокатните автобуси ќе возат на линиите: „3“, „3-б“, „4“, „4-а“, „5“, „7“, „7-б“, „9“, „15“, „16“, „17-а“, „19“, „21“, „21-а“, „22“, „24“, „35“, „41“, „50“, „57“, „59“, „65-в“.