Чувари ќе го бранат Камениот мост

Тие ќе бидат од редовите на вработените во јавните градски претпријатија или во градската администрација, за да не се трошат дополнителни пари за плати

Градските власти ќе ангажираат чуварска служба на Камениот мост. Чуварите ќе треба да ја спречат појавата на дивите препродавачи на импровизирани картонски тезги и да го заштитат значајниот споменик од несовесните вандали кои чкртаат по него или го оштетуваат на кој било начин.

Од Градот соопштуваат дека ги подготвуваат техничките работи и дека е само прашање на време кога оваа служба ќе почне да функционира.

- Наскоро ќе бидат познати сите детали за чуварската служба. Таа би можела да профункционира уште во септември или во октомври. Засега не можам точно да прецизирам како би дејствувала, оти тоа се утврдува - вели Неделчо Крстевски, портпарол во Градот Скопје.

Тој информира дека чуварите ќе бидат од редот на веќе вработените во градските јавни претпријатија или во градската администрација. Целта е Градот да не вработува нови луѓе за да не троши дополнителни пари за нивното плаќање.

Крстевски вели оти во Градот се оптимисти дека со воспоставувањето на оваа служба ќе се спречи појавата на дивите продавачи на мостот и на вандализмот.

- Ние и претходно бевме во постојан контакт со Пазарната инспекција, која е надлежна за решавање на проблемот со дивите препродавачи. Тие реагираат и ги отстрануваат, но продавачите постојано се враќаат. Нашите комунални инспектори не се надлежни за тоа - вели Крстевски.

Од Пазарната инспекција велат дека редовно вршат обиколки на Камениот мост.

- На некои препродавачи им ја одземаме стоката и против нив покренуваме прекршочни постапки, но тоа не е трајно решение. Општините или Градот треба да обезбедат редари - велат од пазарната инспекција.

Директорката на Конзерваторски центар - Скопје, Ема Петрова-Николовска вели дека е договорено натаму Градот да ја преземе грижата за одржувањето на Камениот мост.

- Од наша страна се преземаат сите мерки околу проектот за обновата на мостот, односно за реставрирање и конзервирање. Поставувањето на осветлението беше наша последна активност на мостот за оваа година, оти нема доволно средства. Останува да се доработат клуновите на мостот, но тоа ќе се случи кога ќе завршат градежните работи на објектите на театарот, Музејот и на Уставниот суд. За дозавршување на реставрацијата ќе треба да се изработат проекти, според кои потоа ќе се утврди уште колку пари ќе бидат потребни - вели Николовска.

Таа напомена дека ќе се работи и на уредување на плоштадот Карпошово востание. Ќе се спушта нивото на овој плоштад и ќе се отстранат скалите на крајот на мостот, а тоа ќе биде проект на Општината Центар.

ветија