А1 Арена (Спортски центар „Борис Трајковски“)

Се пробива улица кон салата „Борис Трајковски“

Новопроектираната улица ќе биде долга 300 метри

За триесетина дена кон спортската сала „Борис Трајковски“ ќе може да се приоѓа преку нова улица чија изградба вчера ја означија градоначалниците на Скопје и на Општина Карпош, Трифун Костовски и Андреј Петров. Директната сообраќајна врска до салата, всушност, ќе биде приклучок од булеварот „Илинденска“ кај Воена болница и ќе претставува продолжение на улицата „Бледски договор“, која се сече со булеварот. Новопроектираната улица ќе биде долга 300 метри, а ќе ја изведуваат екипи на ГП „Аполо“. Овој заеднички проект на Градот и на Општина Карпош, како што истакнаа градоначалниците, е само уште еден доказ за добрата соработката меѓу институциите во интерес на побрзата изградба на инфраструктурата неопходна за салата, чија изградба е во завршна фаза. (Дс.Т.)

Utrinski

Се монтира паркетот во салата „Борис Трајковски“

На трибините веќе се поставени жолтите столчиња, а идната недела ќе се монтираат и црвените

Сања Наумовска

Во спортската сала „Борис Трајковски“ започна внатрешното уредување. Во големата сала се монтира паркетот, а од наредната недела ќе се лакира. Истовремено се монитираат и столчињата на трибините. На северната и на јужната трибина веќе се поставени жолтите столчиња, а почнува монтажата и на западната. Во текот на идната недела ќе започне и поставувањето на црвените столчиња. Во малата сала веќе е поставен и лакиран паркет.

Деновиве се очекува да се офарбаат и спортските полиња, а во малата сала ќе се монтираат и фиксните кошеви. Во големата сала сите спортски реквизити се мобилни и ќе се чуваат во магацин, а ќе се монтираат по потреба за различни натпревари. Тим од производителот на опремата, словенечки „Елан“, заедно со македонските колеги активно работи со специјални машини и опрема на уредувањето на ентериерот.

Според најавите од раководството на салата, објектот за еден месец ќе биде подготвен за технички прием. Сите активности се во завршна фаза и се одвиваат во рамките на предвидената динамика. Деновиве се соработува и со комисии од различни институции што ќе го извршат приемот.

Во тек се и завршните занаетчиски работи во внатрешноста. Се фарбаат оградите на трибините и се поврзуваат инсталациите. Се работи и на партерното уредување пред објектот, а веќе е завршено целосното застаклување на фасадата и поставувањето на гранитот пред главниот влез. Поплочени се и тротоарите со бехатон-коцки и поврзани се канделабрите од уличното осветление. На северниот и на западниот паркинг има и еден слој асфалт, на кој, според светските стандарди, се предвидени и делови за паркирање репортажни коли на телевизиски куќи, за кои се направени посебни инсталации за линиите што ќе оневозможат проблеми во сигналите.

Директорот на салата Борис Змејковски вели дека на објектот се работи секој ден и во време на викендите со цел да се испочитува рокот за завршување. Тој најавува дека салата ќе биде целосно подготвена за спортски натпревари и пред Европското првенство во ракомет во декември.

ПОВЕЌЕНАМЕНСКИОТ ОБЈЕКТ НАСКОРО ГОТОВ

Во април свечено пуштање на новата сала

Вкупната сума потрошена за изградба на салата, според директорот на претпријатието што ја гради, Борис Змејковски, изнесува околу 17 милиони евра

Изградбата на повеќенаменската сала „Борис Трајковски“ во Карпош 3 привршува. Од истоименото јавно претпријатие информираат дека градежните и занаетчиските работи се при крај и додаваат дека не само што го запазиле рокот што им го даде Владата туку објектот ќе го завршат и предвреме.  Во салата од мај ќе почнат да се одигруваат натпревари во разни спортови, а во декември таму ќе се одржи и Европското првенство за жени во ракомет.  - Се работи дење и ноќе, со цел салата да биде подготвена за европското првенство. По свеченото пуштање ќе треба да се довршат некои мали работи, како и да се изврши проба на сите системи што се вградени во објектот - вели Борис Змејковски, директор на Јавното претпријатие „Борис Трајковски“. Вкупната сума што е потрошена за изградба на салата, според Змејковски, изнесува околу 17 милиони евра. Тој објасни дека од првичниот проект досега се направени повеќе измени, со цел салата да биде функционална и да ги задоволува светските стандарди.  Повеќенаменската сала „Борис Трајковски“ ќе има 700 паркинг-места за автомобили, како и 32 места за автобуси. Паркиралишта се предвидени од сите страни околу објектот, а планирано е да бидат поврзани со две улици, од страната на хотелот „Александар палас“ и од „Илинденска“. Објектот ќе има капацитет од 6.000 стола, со можност да се стават уште 2.000, по потреба.  Во салата ќе се влегува од повеќе страни, а посебни скали ќе водат кон трибините. Според барањата на меѓународните спортски организации, на најгорниот ред од западната трибина ќе има 27 места за коментатори со по два монитора, како и 12 места за снимање со камери. Во објектот ќе биде поставен и видеонадзор за да се зголеми безбедноста.  Изградбата на спортската сала ја почнаа градските власти во април 2004 година. По една година, во фаза на карабина и' ја предадоа на централната власт поради тоа што немаа пари да ја довршат. Влогот на Градот во салата, како што кажа градоначалникот Трифун Костовски, дотогаш изнесувал 8,5 милиони евра.

Дива депонија ја нагрдува салата

Целиот простор до спортската сала, од страната на „Илинденска“ тоне во ѓубре. Се гледаат купишта смет, шут, тули, остатоци од малтер. Во услови кога комуналните инспекции никого не казнуваат, несовесните граѓани без страв се ослободуваат од градежниот шут наместо да платат за негово истурање на Дрисла.

Имајќи предвид дека се ближи свеченото пуштање на салата во употреба, директорот на Јавното претпријатие „Борис Трајковски“, Борис Змејковски изјави дека неколку пати барал од Градот и од Општината да интервенираат. Му било кажано дека просторот е на приватен инвеститор, но тој смета дека на ниту еден инвеститор не смее да му се дозволи на неговиот плац да се создава дива депонија. Тој се согласи дека ѓубриштето наполно го уништува модерниот изглед на салата и дека не е во ред тој простор пред европското првенство да не се облагороди. Од Градот вчера не одговорија дали и кога планираат да го расчистат и разубават просторот околу најновиот капитален објект во Скопје.

Јорданка Ивановска