Образовни институции (општо)

Нова училишна зграда во Куманово

КУМАНОВО - Осумстотини ученици од албанска етничка заедница во Кумановскиот средношколски центар (економска насока) вчера се вселија во новата зграда во комплексот касарни на поранешната ЈНА. За адаптација и опремување на касарната во средно училиште Министерството за образование и наука вложи 600 илјади евра.

Предавањето на училиштето се одвиваше во многу еуфорична атмосфера со позната иконографија.

Додека учениците славеа, надвор од оградата на комплексот, бучно протестираа незадоволни ученици од гимназиска насока, кои за себе бараат адаптиран простор во истиот комплекс.

Сенка врз целиот настан фрли тоа што некои претставници од локалната власт демонстративно ја напуштија прославата револтирани што организаторот во целата иконографија на албански знамиња, слики и пароли заборавил да го истакне и државното знаме на Македонија.

Единствен говор на македонски јазик беше поздравната реч на градоначалникот на Куманово, Зоран Дамјановски, кој отсуството на државното знаме го оцени како мал пропуст на организатор, но и свој, бидејќи претходно во брзање пропуштил да го разгледа целиот протокол. (Ст.Б.)

Монтажните училишни бараки плачат за пензија

Изградбата на четири спортски сали - во „Зеф Љуш Марку“, „Боро Петрушевски“, „Димитар Влахов“ и во „Наум Охридски“ и санацијата на уште неколку средни училишта ќе реши само мал дел од проблемите со кои се соочуваат 21 училиште во Скопје

Во средните училишта во Скопје се пензионираа многу професори, генерации ученици матурираа, но општеството падна на испитот на зрелоста кога станува збор за одржувањето на објектите во кои се изведува наставата. Истите покриви, фасади, плочки на тоалетите ги чуваат спомените на втората, па и третата генерација ученици.

Во Скопје има 21 средно училиште, од кои некои се во монтажни, а други во бараки од ламарина. Многу објекти се пред распаѓање, со децении вистинските проблеми се затскриваат со делумни крпења, со молерисувања, промена на некој прозорец или врата или на инвентарот. По некоја година - покривите повторно прокиснуваат, фасадите се ронат, а канализациите се затнуваат.

ОПАСНОСТ ОД СТРУЕН УДАР

Монтажни бараки, поставени во 1964 година, кои одамна требало да бидат урнати, се ветеринарното училиште „Браќа Миладиновци“, Државното машинско училиште „8 Септември, но и текстилното. Во него, исто така, проблем е што учениците со децении учат под азбестни покриви. Во многу лоша состојба е и угостителското во Козле „Лазар Танев“. Најризично е школувањето во зградата на гимназијата „Панче Арсовски“ во Автокоманда, каде што на учениците и вработените им се заканува опасност од струен удар поради старата електричната инсталација, која датира од 1960 година.

Распаѓањето на зградите и инсталациите не се единствените маки на учениците. Градските власти се свесни и посочуваат дека голем број школи немаат доволно опрема за нормално изведување на наставно-образовниот процес.

Пред две години, за време на мандатот на претходниот градоначалник на Скопје, Трифун Костовски, се спроведоа мали зафати во шест средни училишта. Поправени се покривите и санитарните јазли во „8 септември“, „Никола Карев“, „Орце Николов“, „Ѓорѓи Димитров“, „Димитар Влахов“ и „Јосип Броз Тито“. Овие зафати беа дел од Програмата за изградба и реконструкција на средни училишта за 2007 година, усвоена од Владата на Македонија, при што за оваа намена беа одвоени девет милиони денари.

И оваа гарнитура на власт предвидува дел од буџетот да се потроши за поправка на објектите во кои учат средношколците.

- Град Скопје предвидува пари за поголеми реконструктивни зафати во училиштата, со што би се подобриле условите за работа на средношколците и нивните професори - велат од Градот.

САЛИТЕ - ВЛАДИН ПРОЕКТ

Обнова и изградба на спортските објекти се дел од изборната програма на актуелниот скопски градоначалник Коце Трајановски. Старите згради на средните училишта „Михајло Пупин“, Наум Охридски“ и „Лазар Личеноски“ ќе се санираат, а во други ќе се градат нови фискултурни сали, соопштуваат од Градот. Нови сали се предвидени за „Зеф Љуш Марку“, „Боро Петрушевски“, „Димитар Влахов“ и „Наум Охридски.

Реконструкцијата на трите средни училишта „Михајло Пупин“, „Наум Охридски“ и „Лазар Личеноски“ е решавање на само мал дел од проблемите. Во градските извештаи од минатите години се велеше дека повеќето од зградите на средните училишта се во катастрофална состојба. Во обновата пари ќе вложи градската власт, а спортските сали ќе се градат со пари од Владата, затоа што изградба на капитални објекти не е градска надлежност.

Предвидено е салите да бидат со површина од 1.300 квадратни метри. Рокот за почнување на изградбата е 2009-2011 година. Иако почетокот на градежните работи бил планиран за минатата година, од Градот велат дека реализацијата ќе следува откако ќе заврши целата процедура за земјиштата за салите.

Градските службеници ни рекоа дека веќе повеле иницијатива пред Министерството за образование и дека се утврдува сопственоста на земјиштата.

- Според наши сознанија, Министерството ги утврдува имотно-правните односи, по што ќе ја почне постапката за добивање на потребната градежна документација. По утврдувањето на сопственичкиот карактер на земјиштето, ќе се пристапи кон изработка на проекти, добивање соодветна документација и конкретна реализација - објаснуваат од Одделението за односи со јавноста на Град Скопје.