Роза Петкова

Трета година, Општина Центар не може да избере фирма која ќе го направи монтажното паркиралиште на улицата Народен фронт. За разлика од Центар, во општина Аеродром монтажниот паркинг не се покажа како проблематичен за градење, па по пет месеци конструкцијата е готова и деновиве ќе се пушти во употреба.
Градоначалникот Владимир Тодоровиќ го вети монтажниот паркинг како решение за проблемот со паркирањето на жителите од Капиштец, иако проектот не го поддржуваат сите граѓани, затоа што многумина сакаат повеќе зеленило во населбата, а не железни конструкции. Скапата цена беше основна причина поради која пропаднаа претходните тендери, додека за последниот, кој заврши минатиот месец, општинарите се уште немаат одговор дали ќе биде успешен.
- Постапката за избор на најповолен понудувач за изградба на монтажниот паркинг е во процедура. За неколку дена, по нејзиното завршување и запазување на предвидените законски рокови, ќе бидете информирани за исходот - кратко одоговори Јовица Ацковски, портпаролот на Општина Центар.
За првиот тендер Тодоровиќ соопшти дека Општината е подготвена да плати сума не повисока од 650.000 евра, додека најниската понуда која тогаш ја добиле била 780.000 евра. Според проектот, избраната фирма треба да монтира конструкција за паркирање на две нивоа, од почетокот на улицата Народен фронт кај последната постојка на автобусот 23, до кафулето „Интермецо“. Вкупниот капацитет ќе биде 500 возила. Општината планира паркиралиштето да го гради во фази, во првата година да заврши третина од вкупната планирана површина, а потоа останатите. Рокот за изведба би требало да биде четири месеци, потоа со паркиралиштето ќе стопанисува претпријатието „Паркинзи на општина Центар“, додека за цената властите спомнаа дека ќе се наплатува, но се уште немаат одлучено по колку. Во Општината велат дека немале никаков проблем да го спроведат тендерот и од прва да изберат фирма.
- На првиот тендер ја избравме фирмата „Промотинг“. Немавме никаков проблем со ниту еден дел од тендерот. Претходно избиравме фирма за да направиме монтажно паркиралиште на друга локација, и тогаш изборот го завршивме од првпат, но таму жителите не сакаа паркинг, па затоа не го изградивме. Ова е прво монтажно паркиралиште во државата, а планираме да изградиме и на други локации, според потребите на жителите - вели Маја Манчевска, портпаролка во Општина Аеродром. Паркиралиштето е во непосредна близина на полициската станица во Ново Лисиче, има надземна платформа и ќе обезбеди 100 места за паркирање. За проектот Општината издвои 325.000 евра од својот буџет, а паркирањето ќе биде бесплатно.