Возен ред

Транспортните патишта ја заобиколуваат Македонија поради што македонска железница трпи огромни загуби. Неофицијално дознаваме дека речиси сите контејнери со стока што доаѓаат од западноевропските земји, поради застој на македонските граници се пренасочени кон Бугарија. Се работи за контејнери со стока, кои преку патничкиот или железничкиот сообраќај стигнуваат до македонско-српската граница од каде што ги преземаат вагоните на македонска железница, кои треба да ги префрлат кон Грција. Во Царина велат дека нема застој на границите, но можна причина за пренасочување на вагоните е засилената контрола на цариниците. - Повеќе пати се случува при контрола на граница да фатиме непријавена стока. Место бисквити или хартија се пренесува тутун, прехранбени производи и алкохол. Ако некој сака да пренесува нерегуларна стока ќе ја избегнува нашата граница. Можеби, ќе од преку Бугарија, ако таму дозволуваат - вели Ванчо Каргов, директор на Царинската управа. Во „Македонска железница “ Транспорт“ велат дека од март транспортот повторно се враќа преку македонската територија. - Проблемот беше актуелен минатата година зашто транспортните компании имале проблем со Македонска царина, велат во „МЖ - Транспорт“. Поради економската криза Македонски железници имаат големи загуби во товарниот сообраќај. Во „МЖ - Транспорт“ велат дека намалувањето на товарниот сообраќај најмногу се должи на намалениот обем на работа на компаниите во металната индустрија. Според статистика за минатата година, количеството на превезената стока во железничкиот превоз е намален за 26,3 проценти во споредба со 2007 година.

Возовите ќе возат по старо

Нема да има редуцирање на железничките линии и покрај огласот објавен минатиот викенд дека од први мај ќе возат по нов возен ред. Во двата дела на „Македонски железници“, инфраструктура и транспорт, ја префрлаат вината за објавувањето на огласот.
- Сега засега нема да има намалување на железничкиот патнички сообраќај - велат во „МЖ - транспорт“.

Маја МИХАЈЛОВСКА

Во исчекување на конечната одлука на Министерството за транспорт и врски дали ќе даде согласност за предлогот на „Македонски железници“ од утре да се укинат третина од возните линии во железничкиот сообраќај, дознаваме дека населението од Зелениково и од Велес, кои најмногу го користат железничкиот транспорт, денеска ќе ги блокираат пругите. За оваа непопуларна одлука, која наиде на огромен револт кај патниците што редовно го користат железничкиот транспорт како убедливо најевтин превоз, од „Македонски железници“ велат дека на тоа биле принудени поради економската криза и големите загуби. Извори од МЖ велат дека во последните пет дена постојано добиваат реакции и петиции од граѓаните, кои бараат да се повлече одлуката за редуцирање на линиите.
Според официјалните податоци од Заводот за статистика, бројот на патниците во железницата во последните три месеци на 2008 година во споредба со периодот на 2007 година, е зголемен за 50 отсто, од 290.000 на 430.000 патници.
- „Македонски железници“ не живеат само од бројот на патници, дури и 100 отсто да бидат полни возовите, дури и да се преполнети, пак ќе има загуба. Бројот на патници не влијае врз рентабилноста на работењето на железници. Намалувањето во товарниот сообраќај како резултат на кризата го погоди нашето работење. Проблем се и стариот возен парк и инфраструктурата поради кои работиме со загуби - велат од службата за информирање во „МЖ - транспорт“.
Со ребалансот на буџетот, владата сега ги преполови првично планираните 15 милиони евра за МЖ.
Официјалните статистички податоци покажуваат дека железничкиот товарен сообраќај во последното тримесечје на 2008 година, во однос на истиот период од 2007 година, е намален за 30 отсто.
Неофицијално, тоа се должи на слабата инфраструктура, лошите пруги, бавното возење и кражбите на контејнерите на царинскиот терминал на граничниот премин Табановци.
Доколку се усвои одлуката, се укинуваат возовите на 12 линии, по една или две дневно кон секоја од редовните дестинации, Битола, Велес, Кичево, Куманово и Кочани.
- Ние сме превоз за социјала и така треба да биде, најевтин превоз. Секаде кога има криза се појачуваат линиите, луѓето се ориентираат кон патување со железница, а кај нас е обратно - коментираат патниците.
Железничкиот превоз е убедливо најевтин превоз. Колку за споредба, трипати е поевтин од автобускиот. Причината е што за разлика од автобускиот превоз, кој со енормното поскапување на бензините кон средината на минатата година ги поскапе билетите, тие во железницата останаа исти. Цената на повратен билет до Битола со воз е 320 денари, а со автобус во еден правец е 500 денари.
Одговорните во МЖ тврдат дека редуцирањето на линиите нема да повлече отпуштање вработени.