Реконструкција на Собранието

Одлука: на парламентот ќе се градат трите куполи

Проектот се коси со Законот за заштита на културното наследство, реагира опозицијата

СВЕТЛАНА УНКОВСКА

По остра расправа, пратениците вчера одлучија да се поддржи предлогот на зградата на Собранието да се изградат три куполи. Опозиционите пратеници ја окарактеризираа ваквата одлука како беспотребно трошење пари на граѓаните, немање вкус и тотален кич и дека ова решение се коси со Законот за заштита на културното наследство на Македонија, со кој е опфатена и собраниската зграда, и дека ќе го наруши автентичниот изглед на парламентарниот дом. Но, тоа не ги премисли пратениците од владејачките партии да ја донесат одлуката.

„Сето ова е само беспотребно трошење пари на граѓаните, на кои не им се потребни бескорисни куполи. Идејата за реконструкција на зградата на Собранието беше поради потребата од поголем простор за работа на пратениците, а не за градење некакви куполи“, рече Роза Топузовска-Каревска во својата жестока реакција против одлуката за градба. Таа ги потсети пратениците и на препораките на претседателот на Управата за заштита на културно наследство, Паско Кузман, според кого реконструкцијата на зградата на парламентот не смее да го наруши неговиот автентичен изглед и покривот мора да биде рамен, фасадата да биде според одредени критериуми, мебелот да биде од дрво и така натаму. Пратеничката Каревска, која беше член на собраниската Комисија за доградба и адаптација на собраниската зграда, се повлече од работата на Комисијата заедно со членот од ДУИ и претседателот на Асоцијацијата на архитектите, кои протестираа поради тоа што не беа прифатени нивните забелешки.

„Против оваа одлука сум поради две работи – затоа што тоа е против Законот за заштита на културното наследство и поради бескорисното трошење пари на граѓаните“, рече Каревска.

Во одбрана на овој проект застанаа Лилјана Поповска од ДОМ и Горан Петров од ВМРО-ДПМНЕ.

„Оваа одлука ја носиме за реконструкција на зградата со внатрешно проширување и јас не ја разбирам реакцијата на пратеничката на ЛДП Каревска“, рече Лилјана Поповска. На ова Каревска рече дека, бидејќи Поповска ништо не разбрала, повторно ќе објасни зошто е штетно градењето на трите куполи.

Пратеникот на ДУИ, Агрон Буџаку, член на Комисијата за реконструкција, овој проект го оцени како една од пропагандите и популизмот на оваа власт. „Ова е одлучено да се заврши како и се' друго. Кога реагиравме во Комисијата, ни беше речено: ’Оваа работа ќе биде завршена со вас или без вас‘, така што ја напуштив Комисијата, затоа што сметав дека учеството во неа е само губење време и нерви“, истакна Буџаку.

Тој го оцени проектот како невкус и тотален кич, а, според него, ВМРО-ДПМНЕ во својот популизам, откако ќе ги изгради куполите, може да стави и лавови. Неговиот сопартиец Азис Положани рече дека идејата за проширување на Собранието се злоупотребува, затоа што мнозинството, како што му било речено, „сакало да остави свој белег“.

„Се прави обид да се стави партиски или верски белег на зградата на Собранието, поради што е најдобро да отвориме јавна дебата за ова“, изјави Положани.