Зеленило

ПОПРАВКИТЕ И ВИСОKИТЕ ТЕМПЕРАТУРИ ГИ ОШТЕТИЈА САДНИЦИТЕ

Улиците се реконструираа, но дрвјата се исушија

Високите температури годинава и сушното лето придонесоа да се исушат голем број млади и стари дрвја по скопските улици и булевари. За брзо време тие ќе бидат исечени, а на нивно место ќе се посадат нови, но останува дилемата колкава е грижата за градското зеленило при високи температури и дали е вложен максимумот за нивно одржување во живот. Всушност само на мал дел е забележлив систем капка по капка, претежно на големите булевари, како што е Партизански одреди, но на сервисните улици, а и на многу други - нема. 

За дрворедите и севкупното зеленило во Скопје е задолжено Јавното претпријатие „Паркови и зеленило“, од каде посочуваат неколку причини за ваквата состојба. Сметаат дека вината не е нивна, туку на општинските власти, кои во последно време раскопаа многу улици и тротоари за нивна обнова со нов асфалт и плочки. Невниманието и брзата работа од работниците ангажирани од локалните власти придонеле да се оштетат многу корења. Ги соголиле и така ги оставиле долго време. На други дрвја не им оставиле доволно простор да се шират, заградувајќи ги метар на метар со павер елементи. Одговорните од „Паркови“ направиле записници и фотографии и сега ќе бараат надомест на штетата, но прашање е колку ќе успеат во тоа, а и дали вреди откако штетата веќе е направена. Последен пат таков записник направиле за улицата Воденска во Kарпош. 

- Во многу општини, каде што се реконструираат улици, е оштетен кореновиот систем на многу дрвја. Општините и градоначалниците работат самоволно и на своја рака. Некои се исушија, а на други им се заканува оваа појава. И покрај тоа што никој не н` консултира за зеленилото пред почеток на јавни градежни работи, ние сепак вршиме увид. Па така упатувавме опомени до работниците и до властите, укажувавме за опасноста, но ретко кој н` слуша - велат одговорните од јавното претпријатие, од каде што немаат евиденција за бројот на оштетени садници. 

Втората причина за сушењето е топлото време. Најнежни се брезите, кои ова лето и најмногу настрадале, наведуваат надлежните. Имаат сознанија дека кај Македонска опера и балет веќе се исушени десетина. Истакнуваат дека е потребно инсталирање систем „капка по капка“ секаде каде што има садници, но за тоа се потребни средства. „Паркови“ е едно од најсиромашните претпријатија, каде што едвај вработените земаат плата, бидејќи приходите не му се силна страна. Од таму посочуваат дека за вакво нешто треба да се погрижи градската власт, а и општините ако сакаат на нивна територија да има бујно зеленило.

Јорданка Ивановска