Паркирање и паркинзи (општо)

АЕРОДРОМЦИ СЕ ЖАЛАТ НА узурпациЈа на Јавните површини

Паркингот кај „Три бисери“ претворен во салон за автомобили

Паркиралиштето кај трговскиот центар „Три бисери“, кој е јавна површина, наместо да им служи на станарите од околните згради, претворен е во уличен продажбен салон за возила. Станарите од зградите на „Јане Сандански“ 9 и 11, кои инсистираа на анонимност, објаснија дека нивни сосед, со месеци, узурпира дел од паркингот со стари половни автомобили. Тој, оттука, всушност ги продава. Секојдневно може да се видат муштерии како разгледуваат, се пазарат и склучуваат зделки со соседот.

- Ние буквално нема каде да се паркираме. Нашиот сосед располага со десетина автомобили кои потоа ги нуди на заинтересирани купувачи. На автомобилите е истакнат и неговиот телефонски број на кој тие може да го добијат. Тој отворил фирма на улица, остварува профит, а никој од надлежните не презема мерки - се жали Д.Л. станар од зградата со број 9.

Засегнатите граѓани изјавија дека апелирале до Општината Аеродром да ги преземе потребните мерки, но, според нив, без успех, затоа што бизнисот со автомобили си тече непречено. Тие повторно бараат од општинските служби да им се ослободи место за да има каде да ги паркираат своите автомобили.

Од Општината Аеродром одговорија дека нивните инспекциски служби се запознаени со случајот и дека реагирале во рамките на нивните надлежности.

- Сопственикот на возилата е известен, поточно предупреден да ги отстрани, а информирана е и полицијата да ја контролира ситуацијата. Ние не сме надлежни да ги отстраниме тие возила, ниту, пак, да го казниме сопственикот - изјавија од Одделението за односи со јавноста.

Според нив, овој проблем ќе се реши наскоро бидејќи на овој потег ќе се воведе зонско паркирање. Сметаат дека тоа трајно ќе ја елиминира злоупотребата на јавни површини за остварување приватен профит.

Од Секторот за внатрешни работи - Скопје при МВР објаснија дека и тие немаат ингеренции при вакви случаи. Доколку возилата се прописно паркирани на паркингот тие немаат ингеренции да ги отстранат автомобилите.

- Онаму каде што има прописно паркирани возила, а нема зонско паркирање, тогаш нема основа за казна. Но, доколку се паркирани на места, на пример каде попречуваат некој влез, тротоар, или зафаќаат зелена површина, тогаш можеме да го казниме сопственикот. Казната во таков случај изнесува 45 евра или 5 казнени поени - појасни Лиза Бендевска, портпарол во СВР Скопје.