ПО ШЕСТ ГОДИНИ МИРУВАЊЕ

„Ера сити“ ќе се гради според нов проект

Унгарски инвеститори ќе инвестираат заедно со словенечката групација „Ера“ во изградбата на комерцијално-деловниот комплекс „Ера сити“, најавува раководството на „Скопски саем“. Изградбата на овој комплекс, најавуван како „град во град“, почна во февруари 2008 година и многу брзо застана. Работите оттогаш се во мирување, а има најави дека наскоро повторно ќе се придвижат, но според нов концепт што го подготвиле унгарските инвеститори.

Извршниот директор на „Скопски саем“, Дејан Kошути, вели дека лани напролет бил постигнат договор со компанијата „Три гранит“ од Унгарија, која заедно со словенечката групација „Ера“ ќе гради трговски центар и деловни згради. Kомплексот би се изградил за две години од добивањето на градежната дозвола.

- Површината за развој на проектот е 110.000 квадратни метри. Во моментот е при крај постапката за измената на деталниот урбанистички план во согласност со концептниот дизајн изработен од страна на компанијата „Три гранит“ - потенцира Kошутиќ.

Портпаролот на Општината Гази Баба, Емилија Kипровска, потврди дека предлог-деталниот план е во постапка и се чека позитивно мислење од Град Скопје.

- Измените ќе бидат донесени по спроведувањето на законските регулативи. Опфатот на планот зафаќа површина од 23 хектари за комерцијални и за деловни намени - изјави Kипровска.

Kако што потенцираат од „Скопски саем“, во изминатиот период бил изработен концепт-дизајн и предлог бизнис-план за проектот, а за сите нови информации медиумите ќе биле навреме известени. Не прецизираа точно кога би продолжила изградбата на комплексот, ниту одговорија колку пари ќе бидат вложени.

Kошутиќ вели дека во периодот од 2008 до крајот на 2011 година изградбата на високоградбата била ставена во мирување поради глобалната економска криза.

- Проект од овој вид и габарит бара надворешни финансиски извори, стратешки партнери и закупци на простор. Од тие причини беше ставен во мирување. Од почетокот на 2012 година продолжени се преговорите со стратешките партнери од надвор и со потенцијалните закупци на просторот - вели Kошутиќ.

Изградбата на „Ера сити“ почна на 1 февруари 2008 година кога беше поставен камен-темелник на деловната зграда со планирана површина од 33.600 квадратни метри. Тоа, како што беше најавено, требаше да претставува прв нов објект од најголемиот и најсовремен деловен трговски и забавен центар во регионот. Вредноста на тогаш најавената инвестиција на групацијата „Ера“ беше 150 милиони евра. Беа предвидени бизнис-зграда, два трговски центра, три деловни објекти и три катни гаражи.

Во јуни 2012 година беа објавени информации дека турската компанија „Турк мол“ е заинтересирана да влезе во проектот, но ваквата најава не се оствари.

http://dnevnik.mk/?ItemID=0F11413C55BF4E48BED39E0DEFAC8565

ЕРА Сити на Скопски саем за три до четири години

Скопски саем заедно со ТриГранит групацијата ќе го реализира проектот ЕРА Сити

Како што соопштуваат од Скопски саем, развојните планови на групацијата ЕРА вклучуваат изградба на нов градски шопинг центар, кој ќе биде изграден во непосредна близина на центарот на градот Скопје и вклучува шопинг и забавен центар, деловни објекти и хотел.

Претседателот на Управата на Групацијата ЕРА Гвидо Омладич изрази големо задоволство од потпишувањето на договорот што, како што вели, значи последен чекор во реализацијата на проектот ЕРА Сити. - Групацијата ТриГранит со своето знаење, искуство и успешни проекти, што се гледа од добиените награди „Developer“ за 2012 година, доделена од страна на CEE Real Estate Quality Awards, ќе го надогради нашето партнерство на највисоко квалитетно ниво. Со целокупниот комплекс Скопски саем и новоизградениот ЕРА Сити сакаме заедно со ТриГранит да ја зајакнеме улогата на водечки понудувач на меѓународни настани и event индустрија во ЈИЕ. Со додавање забавки и деловни содржини ќе ги надоградиме постоечките дејности и ќе ја искористиме меѓусебната синергија и на тој начин ќе ја зголемиме атрактивноста и уникатноста на целиот комплекс, истакна Омладич.

Извршниот директор на ТриГранит Арпад Торок истакна дека нивната компанија има долгогодишни искуства за развој на нови градски шопинг центри. - WestEnd Sity Center  во Будимпешта, Бонарка во Краков или Пзнан Сити Центарот, кој се отвора оваа година, се одлични примери за нашите обемни референци во Средна и Источна Европа. Го развивме и проектот Арена Центар, најголем трговски-забавен центар во Загреб и Арена Загреб, повеќенаменска спортска арена, кои се слични со проектот на групацијата ЕРА во Скопје. Како партнер за развој на Групацијата ЕРА, способни сме да ги искористиме искуствата, кои ги стекнавме досега и во Република Македонија, која за нас е нов пазар, рече Торок.

Извршниот директор на ТриГранит менаџмент Филип Еванс, потенцира дека со влегувањето на пазарот на Република Македонија го пришируваат не само нивното професионално портфолио, туку и сорботката при управувањето на саемскиот и изложбениот простор на нивното стручно портфолио.

Тој додаде дека со потпишувањето на овој договор компанијата ТриГранит Менаџмент Корпорејшн го зајакнува присуството на Балканот.

Корпорацијата ТриГранит, како дел од соработката, со Скопски саем ќе биде вклучена во реализација на настаните на Скопски саем и Метрополис Арена како повеќенаменска мултифункционална изложбена хала.

Групацијата ЕРА е сопственик на Скопски саем, најголем саемски и изложбен простор во Македонија со површина од 55.000 метри квадратни. Компелксот е дел од 16 хектари земјиште во сопственост на Групацијата ЕРА, сместено на 23 хектари детално урбанистички уредена површина.

ТриГранит Девелпмент Корпорејшн е една од најголемите претпријатија кое се занимава со развој на недвижности во Европа, и со инвестиции, развој и управување со недвижности. Работи во седум држави во Средна и Југоисточна Европа и  има големо портфолио на довршени атрактивни недвижности, бројни подготвени проекти за повеќенаменска цел, како и со многуте инвестиции во јавно-приватно партнерство. скс/паг/13:48

http://www.mia.com.mk/mk/Inside/RenderSingleNews/93/102239077#