Деловен објект на местото на старата Народна банка

Антикорупциска и државниот правобранител против објектот на кеј

Ќе се поведе привремена мерка за враќање на работите во претходна состојба

Кејот узурпиран од лимените огради и импровизираниот надземен премин поставени за потребите на градилиштето на деловниот објект на аголот помеѓу кејот и плоштадот да се врати во првобитна состојба. На вакво барање работи Државната антикорупциска комисија во соработка со државниот правобранител.

Мирјана Димовска, претседателка на Комисијата, за случајот со изградбата на административно-деловниот објект вчера соопшти оти Комисијата е со став дека проблемот постои уште од 2005 година кога било продадено земјиштето. Таа најави дека на случајот се работи интензивно во соработка со државниот правобранител за поведување привремена мерка за враќање на работите во претходната состојба.

Државниот правобранител Оливера Китановска објасни дека тоа значи инвеститорот на објектот да ги замени постојните лимени грдосии со нешто посоодветно. Китановска не беше категорична дали станува збор за отстранување на оградите и надземниот премин.

„Првенствено треба да се преслушаме дали имаме воопшто ингеренции во случајов што го поведе Антикорупциската комисија. Доколку се утврди дека е загрозен државниот интерес, ќе поднесеме барање до Основниот суд Скопје 2 за предлог за привремена мерка, односно судот да донесе решение оној што ги поставил мостот и оградите ,да ги тргне. Во случај тие да се неопходни за градилиштето, грдосиите од лимот да се заменат со нешто посоодветно“, ни изјави вчера Китановска.

Александар Ивановски, управител на фирмата „Дивелоп“, една од инвеститорите на објектот, поради неодложен состанок вчера немаше време да ги коментира најавите од Антикорупциската комисија. (Дс.Т.)

Антикорупциска бара Кејот да се врати како што беше

Антикорупциската комисија и Народниот правобранител ќе побараат да се врати привремено претходната состојба на кејот 13 Ноември и сметаат дека случајот со градбата на административно-деловниот објект постои уште од 2005 година, кога било продадено земјиштето.Но, Општина Центар се оградува од обвинувањата дека со нивна градежна дозвола се затворил кејот 13 Ноември и дека дека немаат никава одговорност зошто сега наместо пешаци, се шетаат камиони.

Во писмото до медиумите општинарите велат дека не треба да ги сметаат за дежурен виновник за новата градба во центарот на Скопје, на Кејот на Вардар.Во писмото пишува дека одобрението за градење на објектот е според Детаљниот урбанистички план од 1997 година, донесен од Советот на Општина Центар, кога мнозинството членови во Советот биле од СДСМ.

Од општината објаснуваат дека во пресметката и договорот за платени комуналии потпишан од инвеститорот и Град Скопје, стои оти корисникот се обврзува и согласува да учествува со свои пари да проектира и изгради пристапна подземна улица до објектот на свој трошок, во согласност со ДУП, од улица Војвода Васил Аџиларски по кеј 13 Ноември до објектот, да ја почне во рок од 6 месеци откако ќе добие одобрение за градење, а да ја заврши пред да добие употребна дозвола за објектот.