Деловен објект на местото на старата Народна банка

Власта и опозицијата повторно со меѓусебни обвинувања за узурпацијата на кејот 13-ти ноември, која незаконски ја дозволи градоначалникот на Скопје Трифун Костовски.

Ако не се тргнат лимените паравани, СДСМ ќе ги поддржeле граѓаните во протестите против општина Центар и градот Скопје.

„Одговорноста за последиците лежи кај градоначалничката на Центар, Виолета Аларова, градоначалникот на Скопје, Трифун Костовски, и министерот за транспорт и врски, Миле Јанакиески, кој дал согласност за овој детален урбанистички план“, изјави Дамјан Манчевски од СДСМ.

Од ВМРО-ДПМНЕ повторно потсетија дека во време на СДСМ е продадено земјиштето на кое се гради, по багателна цена и со непосредна спогодба.

СДСМ била на чело на општина Центар кога прв пат била вметната и маркичката за објектот. Но, во случајов земјиштето не е спорно, туку незаконската одлука на Костовски за узурпација на кејот.

Министерот Јанакиески се огради од одговорност. Тој не издал никаква дозвола за незаконското уништување на шеталиштето.

„Министерството за транспорт и врски нема издадено никаква дозвола за поставување на било какви огради и тараби на кејот на реката Вардар“, рече Миле Јанакиески, министер за транспорт и врски.

Костовски кршејќи ги законите дозволи на инвеститорот да го уништи кејот. Наместо да чека да се изгради подземна сообраќајница по која со камиони би се носел градежниот материјал, тој го претвори кејот во градилиште затворено со лимени паравани се до крајот на 2010-та.

Се уште Костовски не одговорил дали го уништи кејот поради личен профит. Граѓаните веќе реагираат дека параваните веднаш мора да се тргнат.

A1 - Сунчица Николоска - 12.11.2008

Незаконска градежната узурпација во центарот на Скопје

Претворен ли е кејот на Вардар бесправно во градежна зона? Инвеститорите и надлежните молчат, но затоа пак се огласија архитектите кои велат дека има дупки во законот кои им даваат одврзани раце на компаниите што градат.

Недостига правилник што ќе го регулира уредувањето на градилиштата, затоа многу пати инвеститорите ги злоупотребуваат правата додека градат објекти, вели архитектот Мирослав Грчев.

„Поради таа законодавна темница, постои една сива зона во којашто градителите, инвеститорите и државните органи надлежни за спроведување на плановите и за надзор, сите тие импровизираат. Тука се заради тоа можни сериозни корупции“, изјави Мирослав Грчев, архитект.

Според Законот за градба, фирмите треба да имаат решени имотно-правни односи за целото земјиште што го користат за градење. Ова значи дека во случајот со градбата на кејот на Вардар, фирмите инвеститори треба да го поседуваат целиот простор што го заградиле, од плоштадот Македонија до хотелот „Холидеј Ин“.

Од општината Центар и градските власти на Скопје нема одговор дали градителите на плоштадот го купиле целото земјиште што го затвориле.

Коментарот од надлежните е дека се е според законот и покрај тоа што е прекината е главната пешачка зона, а граѓаните некое време ќе мора да се откажат и од популарното шеталиште.

„Имаме решенија за коишто може да се рече дека се несреќни и дека за едно градилиште жртвува премногу градски интерес, премногу градски вредности на предолго време, на начин којшто граѓаните практично не го одобруваат“, вели архитектот Грчев.

Изградбата на деловниот објект во центарот на Скопје почна неодамна. Како официјален инвеститор е назначенa фирмата „Дивелоп груп“. Опозицијата тврдеше дека оваа компанија, заедно со фирмата „Латис“ се главните носители на овој проект.

Опозицискиот блок посочуваше дека зад овие две фирми стојат познатите бизнисмени Орце Камчев и Алек Ивановски - Теранова. Дел од тврдењата беа дека токму за да стартува изградбата на новиот објект бил сменет и целиот урбанистички план на општина Центар.

Кој го заградил, за свои комерцијални потреби кејот во Скопје. Кој му дал решение со дозвола која патем треба да трае најмалку 18 месеци. Најпосле Кејот е јавен заеднички простор кој ни е неопходен на сите. Колку се платило и кому, кејот да биде без својата основна функција?!

Голем дел од кејот 13 Ноември, кој претставува јавна површина, од вчера е ограден и затворен за движење на пешаците. Ова најпрометно шеталиште во градот, Скопјани нема да можат да го користат во наредните година и половина, а најверојатно и повеќе, односно онолку колку што според проектот треба да трае изградбата на осумкатен административно-деловен објект, кој деновиве интензивно почна да се гради на просторот меѓу некогашен Метропол" и коритото на Вардар. Кејот 13 Ноември, односно патеката покрај ѕидот која единствено беше слободна за движење на пешаци, во овој период ќе стане улица по која ќе се движат камиони и градежна механизација, која според информациите што ги добивме од Градот, до март 2010 треба да биде доставуван градежен материјал до објектот. Иако се работи за јавна површина за која сите граѓани плаќааат данок, во случајов никој не ги прашал дали може некој да го користи овој простор и за тоа да не плаќа. А дека не се плаќа, потврдуваат и во Град Скопје.

-Градот Скопје нема наплатено комунална такса зашто зафатот на кејот не подлежи под одлуката за наплата на комунални такси за користење на јавните површини. Инвеститорот има оставено банкарска гаранција дека по завршувањето на градежните работи ќе ја врати јавната површина во првобитна состојба. Доколку не го стори тоа, Градот ќе ја активира банкарската гаранција, велат во Одделението за односи со јавност на Град Скопје. Истото го потврдуваат и во Секторот за правни работи на Град Скопје, од каде велат дека во случајов не се работи за изведување на некоја определена дејност, па по тој основ и да се наплаќа, туку се работи за обезбедување на пристап до објект за изведување на градежни работи.

-Во согласност со ДУП под овој дел од Кејот ќе се гради подземна улица, која ќе биде единствен пристап до објектот, па во случајов се работи за оградување на градилиште за кое е издадена цела пропратна документација, велат во Секторот. Според Јован Христовски, раководител на Секторот за сообраќај на Град Скопје, Градот само издава сообраќајно решение и тоа на решение за градба кое е веќе издадено од Општина Центар, а оградата е поставена, како што вели со цел да се заштитат граѓаните кои седат во кафулињата.

Од Општина Центар, единствено што успеавме да дознаеме е дека за повеќе информации околу оградување на кејот треба да се обратиме во Градот".

Објектот кој во наредните година или две им го зема шеталиштето на скопјани, според ДУП може да има максимална висина од 29 метри, а се гради на површина од 1.100 квадратни метри на делот пред некогашен Метропол. Инвеститор на објектот е скопската фирма Дивелоп груп", претставник на италијанските газди што го купија некогашен Типо". Тие одобрението за градба го добиле од Општина Центар на 19 март годинава. Инаку, плацот на плоштадот Македонија во 2004 година, за само 25 евра за квадрат, го продаде тогашниот Министер за транспорт и врски, Агрон Буџаку, наводно на скопскиот бизнисмен Орце Камчев, а се покажа не било така.

http://vecer.com.mk/?ItemID=C4CE9AE8B34A604282F8890805B43695