Наскоро комплетен студентскиот кампус во Струмица

Во новите простории во комплексот на поранешниот Институт за јужни земјоделски култури во Струмица месецов и практично ќе почне со работа новиот студентски кампус на Универзитетот „Гоце Делчев“ од Штип. За неговата изградба Владата инвестира 44 милиони денари.Се работи на лабораториите за изведување практична настава, изградбата на ресторан за исхрана на студентите, како и на уредување на паркинг-просторот на површина од 2.000 квадратни метри.

- Универзитетскиот кампус во Струмица во текот на овој семестар ќе ги прифати студентите по земјоделски, економски и информатички науки. Наесен, во почетокот од новата студиска година, ќе почне со работа и студиска програма од Педагошкиот факултет. Со тоа во овој кампус наставата ќе ја организираат четири факултети, на кои очекуваме само во прва година да бидат запишани околу 500 нови студенти - вели Саша Митрев, ректор на Универзитетот „Гоце Делчев“.Универзитетскиот кампус зафаќа површина од 3.000 квадратни метри и е опремен со најсовремени средства за изведување вежби и настава.

УЧИЛИШТАТА ВО ОПШТИНА КАРПОШ - РЕПЕР ЗА ЕВРОПСКИ ШКОЛСКИ СТАНДАРД

Најсовремена зграда за ОУ "Димо Хаџи Димов"

Целосно ново, футуристичко училиште, на повеќе катови, со две големи спортски сали, тениски терени и нови училници од светски стандарди, во кои ќе има услови за повеќе од 1600 ученици, во блиска иднина ќе се гради на местото на постојното веќе дотраено училиште Димо Хаџи Димов во Влае. Инвестицијата од 2 милиони евра, во Општината Карпош, вчера, ја соопштија премиерот Никола Груевски заедно со В.Д градоначалникот Саша Димиќ преку презентирање на предлог планот за идејното архитектонско здание на новото училиште во Влае.
- Дојдов тука во училиштето да ги погледнеме условите и на некој начин да го означиме почетокот на изградбата на ова веќе дотраено училиште сместено во трошни бараки кои се потенцијална опасност од пожари и надворешни временски услови, изјави премиерот Груевски. Тој додаде дека половина од средствата за изградба, 60 милиони денари, се веќе обезбедени, а вториот дел од нив ќе биде обезбедени во текот на наредната година и ако е потребно, како што рече, ќе помогне и Владата.

В.д. градоначалникот и кандидат за градоначалник на Општина Карпош, Сашо Димиќ, напомена дека училиштето "Дими Хаџи Димов" е најголемото училиште на територијата на општината Карпош со 1400 ученици и ја потенцираше лошата состојба на училиштето.

"За жал, во ова училиште образовниот процес се одвива во едни руинирани услови кои датираат од 1964 година. Очекуваме оваа година да започне изградба на ново училиште и тоа ќе биде најсовремено училиште во Македонија со капацитет од 1600 ученици. Ова училиште ќе ги има сите услови што се потребни за одржување на наставата и тоа со сите стандарди", изјави Димиќ.
Инаку, во проектот покрај модерното просторно испланирано сместување на учениците во него се предвидува изградба на две големи спортски сали, една на самиот покрив од објектот, тениски игралишта и современ амфитеатар во средиштето на објектот. Учениците за време на извршувањето на градежните активности ќе бидат сместени во специјални контејнери, како во примерот на Јан Амос Коменски.