Тротоарите за пешаците, автомобилите во двор

Хаосот во сообраќајот ќе се регулира со казни за оние што ги паркираат своите возила на тротоарите, а не во дворовите

Општината Карпош воведува ред во паркирањето

Забрана за паркирање на автомобилите пред сопствените домови. Вакво известување им е доставено на жителите од населбите во општината Карпош, кои живеат во индивидуални куќи и имаат гаражи или простор за автомобилите во своите дворови. Некои од жителите од улиците Дрезденска, Женевска, Варшавска, Иван Цанкар, Ванчо Мицков, Демир Трајко, се револтирани од овој потег на општинските власти. Сметаат дека не е фер што им се забранува автомобилите да ги паркираат на тротоарот пред куќата.

- Цел живот си го паркираме автомобилот на тротоарот пред влезот на куќата. Не знам зошто сега да нé казнуваат за тоа. Што треба сега да правиме. Секое доаѓање дома да влегуваме со автомобилите во дворот. Некои од нас немаат места за автомобилите покрај куќите, па зарем сега треба да рушиме нешто во дворовите, да си ги исечеме дрвата. Зошто општината не ни направи и нам јавни паркинзи. Многу куќи се во прашање. И што е најтрагично, не станува збор за фреквентни улици, туку за маалски, по кои нема многу сообраќај - се жали Сузана Б. од Тафталиџе.

Во известувањето од општината Карпош е посочено дека паркирањето на автомобилите на тротоарот пречи за нормално одвивање на сообраќајот.

- Во согласност со правилникот за стандарди и нормативи за урбанистичко планирање имате обврска сопствените возила да ги паркирате, односно оставате во границите на вашата градежна парцела. Паркирањето, односно оставањето на возилата на улица, претставува пречка за нормално одвивање на сообраќајот, движењето на пешаците и велосипедистите, како и за нормалното одржување на јавната чистота. Доколку не се постапува според ова известување, возилата ќе бидат отстранети од страна на стручна служба на сметка на сопственикот на автомобилот - пишува во известувањето од комуналната инспекција на општината Карпош.

Надлежните од општината велат дека е сосема нормално да се донесе ваква забрана затоа што се работи за улици по кои има многу сообраќај.

- Вакво известување им е доставено на сите оние што живеат во куќите покрај фреквентните улици во општината. Пешаците по населбите Тафталиџе или дел од Влае немаа каде да одат, поради тротоарите што се користат како паркиралишта. Или зиме на пример, кога има снег, зимската служба не може да ги расчисти коловозите. Не се работи за споредни улици, туку за оние главните по населбите. На Дрезденска, на пример, се наоѓа Катастарот, каде што и онака има метеж од странките, а хаосот е уште поголем со автомобилите паркирани на тротоарите. По населбите има и неколку училишта, па поради безбедноста на учениците неопходно е да се преземе ваква мерка на претпазливост. За овој потег се решивме и поради тоа што повеќето од посочените улици се реконструирани, вклучувајќи ги и тротоарите - вели Виолета Цветковска, портпаролка на општината Карпош.

Некои жители од Влае, пак, се воодушевени од ваквата одлука на општината.

- Конечно да се воведе некој ред. Живеам на улицата Франц Прешерн, во населбата Влае, која дење-ноќе е блокирана од возилата паркирани од двете страни. Тука веќе ниту пеш не се оди, ниту со велосипед, ниту со автомобил. Би било фино кога и на оваа улица би се направил ваков режим на сообраќајот - вели Ненад К. од Влае.