Јавна чистота

Инспектори казнуваа за паднато компирче

Градски комунални инспектори деновиве ги казнуваат граѓаните на кои ненамерно им паѓаат компирчиња од сендвичите,кај сендвичарниците во близина на Паркот на жената-борец. Инспекторите, придружувани од полицајци, и вчера им пишуваа казни во износ од 50 евра во денарска противвредност не само на граѓаните на кои им паѓа помфритот туку и на оние што фрлаа ѓубре на јавните места. - Градот е полн со ѓубре што комуналците не го собираат редовно, насекаде се создаваат мали депонии, а им пишуваат казни на граѓаните што претходно не се опоменати за ваквите казни. Ние овде, на клупите пред сендвичарниците, јадеме секој ден. Да се пишува казна за едно паднато компирче, тоа го нема никаде - велат граѓаните. Казните за фрлање ѓубре на несоодветни места се пропишани пред шест месеци со измените на Законот за управувањето со отпадот. Со нив се предвидени казни од 30 до 200 евра за физички лица за фрлање догорче на улица, за палење оган на несоодветни места, за истурање ѓубре, шут, масло на јавни површини итн. Казните за правни лица се повисоки. Нив можат да ги изречат градските и комуналните инспектори за животна средина на самото место. На граѓанинот што фрла ѓубре му се дава платен налог, што мора да го плати во рок од осум дена. Во спротивно, ќе биде повикан пред прекршочна комисија во Министерството за животна средина и просторно планирање. Иако се донесени пред половина година, казните се' уште не се применуваат редовно. Градскиот комунален инспектор Александар Бошковиќ потврди дека нивни вработени казнувале вчера во центарот на Скопје. Тој објасни дека на терен имало две градски екипи на кои им асистирала полиција. Се согласи дека можеби мерките се драстични, но смета дека мора да се почне со казните, со цел законот реално да стапи во сила, а и граѓаните да почнат да се однесуваат совесно. Бошковиќ рече дека ќе ја разгледаат можноста граѓаните извесно време да се опоменуваат за некои ненамерни постапки, како на пример случајното паѓање на компири од сендвичите.

- Три месеци го пролонгираме Законот, односно немаме изречено ниту една казна. Сето тоа поради разбирањето кон граѓаните, со цел да ги научат одредбите за што се' може да бидат казнети - изјави Бошковиќ. Во минатата недела, според него, градските комунални инспектори на скопјани им изрекувале мандатни казни за фрлање догорчиња на улица. Таа изнесува 30 евра.

(А.Е.)