Железнички станици

СКОПСКАТА ЖЕЛЕЗНИЧКА СТАНИЦА ЛИЧИ НА СЦЕНА ЗА ХОРОР ФИЛМ

Кензо Танге се превртува во гробот

Реконструкцијата на Железничката станица во Скопје е планирана за годинава, но дали и кога ќе почнат работите ќе зависи од приливот на средства. Со проектот за обнова предвидено е да се обнови плочникот пред станицата, да се заменат влезните врати со нови кои ќе работат на сензор, потоа да се реконструираат тоалетите и чекалниците

Ако првата слика за еден град во кој пристигнувате со воз за прв пат е неговата железничка станица, тогаш првиот впечаток за Скопје што го имаат луѓето е дека тоа е валкан град, во кој сe се распаѓа. Ваква слика за градот добиваат над 3.000 луѓе дневно колку што во просек пристигнуваат на скопската Железничка станица. Ако некогаш беше гордост на Скопје, таа сега е срамна дамка која никој не се труди да ја исчисти и уреди. Станицата е изградена 1980 година. Ја проектираше познатиот јапонски архитект Кензо Танге, но бидејќи изведувачите направиле измени во проектот тој одбил да го потпише.
Уште на самиот влез во станицата секој патник може да ја почувствува бедата и мизеријата. Валканите и расипани врати се постојано отворени, а во холот ве дочекува остар мирис на непроветрен и застоен воздух. Прав и нечистотија излегува од секоја пора на објектот. Некогаш чисто белите ѕидови се покриени со со години таложена нечистотија, а на секој чекор може да се видат огромни висулци пајажина. Нечисто и застарено изгледаат и билетарниците, а скалите до чекалниците се приказна за себе. Патниците се принудени багажот да го влечкаат по скалите, на чија ограда висат кабли од искршените странични светилки, а елеваторите покриени со ѓубре и прав одамна не работат. Од неколкуте чекалници во Железничката станица работеше само една, каде начекавме неколку бабички како седат на застарените пластични столчиња, зад завеса од нечисти стакла. Една чекалница беше затворена со катанец, а останатите простории беа целосно затворени и покриени со завеси.
Од јавните тоалети на станицата се шири реа на мочка, а физиолошка потреба во полураспаднатите кабини се наплаќа по 10 денари.
Белите мермерни плочки со кои е поплочена внатрешноста на станицата, одамна се посивени и потемнети, а оние на пероните се искршени, уништени или воопшто ги нема. На пероните има едвај неколку дотраени клупи, неколку бетонски корпи за отпадоци и 'рѓосани светилки. На пероните нема никаква информативна табла за тоа кога пристигнува следниот воз ниту пак колку ќе доцни. Некогашната најнова и најмодерна станица во земјава, која е пуштена во употреба пред 29 години, сега личи на сцена за хорор филм.
Стојан Малиновски, заменик-директор за сообраќај во ЈП Македонски железници, вели дека, за жал, станицата е во ваква лоша состојба затоа што со години ништо не е вложено во неа. Тој објаснува дека месечните трошоци за одржување на Железничката, односно за телефон, парно, струја, вода и за лифтот изнесуваат околу 15.000 евра.
"Одржувањето е многу тешко, бидејќи се потребни многу пари. Се трудиме колку што можеме да ја држиме чиста станицата, но толку се можностите. Жените со уште чистат само со обична крпа, бидејќи немаме пари да купиме машини за миење на мермерот. Одржувањето не подразбира само плаќање на тековните трошоци што веќе ги спомнав, но, за жал, со години ништо не е вложено во обнова на станицата и таа сега е ваква каква што е", вели Малиновски.
Тој објаснува дека претпријатието има план и програма за обнова на сите железнички станици во земјава, која треба да заврши до 2012 година. Реконструкцијата на Железничката станица во Скопје е планирана за годинава, но дали и кога ќе почнат работите, како што вели Малиновски, ќе зависи од приливот на средства.
"Веќе ги обновивме железничките станици во Скопје-Север и во Илинден, како и граничната станица Табановце каде што се врши примопредавање на возовите меѓу Македонија и Србија. Скопската железничка планираме да ја обновиме годинава, но дали годинава ќе успееме да ја завршиме реконструкцијата ќе зависи и од приходите што ќе ги оствариме и од тоа дали ќе добиеме финансиска помош од Владата", вели Малиновски.
Со проектот за обнова на станицата предвидено е да се обнови плочникот пред станицата, да се заменат влезните врати со нови кои ќе работат на сензор, потоа да се реконструираат тоалетите и чекалниците.
"Планираме постојниот разглас за пристигањето на возовите да го замениме со информативен систем со монитори, како секаде во светот. Да ги обновиме постојните ескалатори, односно да ги ставиме во функција и покрај нив да направиме ленти за багаж, како и да обезбедиме пристап за инвалиди. Треба целосно да се поплочат пероните, што по мене е најбитно, бидејќи сега оттаму протекува вода во самата станица", вели Малиновски.
Во рамки на обновата, надлежните во ЈП Македонски железници планираат една од просториите на катот каде што се чекалниците да направат железнички музеј, а на плочникот пред влезот на станицата да постават парна локомотива.
"Обновата на станицата мора да ја почнеме годинава, барем плочниците на пероните да ги обновиме. Се надевам дека следната година ова време Железничката станица ќе изгледа многу поинаку", вели Малиновски.