Субрата пристигна, законот за аеродромот на вода во Собрание

Индискиот бизнисмен Субрата Рој, денеска пристигна во трета посета на Македонија за помалку од една година. Тој најави дека е заинтересиран да гради туристички комплекс на Охридското Езеро, како и огромен споменик на Мајка Тереза на плоштадот „Македонија“ во Скопје

Милијардерот, кој денеска слета на охридскиот аеродром „Св. Апостол Павле“, беше пречекан од вицепремиерот и министер за финансии Зоран Ставрески, кој ќе го придружува гостинот за време на неговата дводневна посета на Охрид и Скопје.

Според најавите, Рој повторно ќе ја посети локацијата каде што планира да гради туристички комплекс, на Охридското езеро, во близина на автокампот „Љубаништа“. Суперлуксузниот туристички комплекс „Сахаријан Македонија“, замислено е да има површина од 240 хектари и да предвидува повеќе содржини, како луксузен хотел на вода и апартмани од највисока класа, вили, бунгалови, марина, приватни плажи, казина и голф-терени.

Неговото доаѓање се поклопува со Предлог-законот за дополнување на Законот за внатрешна пловидба, со кој се создава правна регулатива за функционирање аеродром на вода, кој денеска доби поддршка од собраниската Комисија за транспорт, врски и екологија. Преостанува, во скратена постапка, уште да добие поддршка од македонските пратеници.

Со предложените решенија се уредува обележувањето подрачје на аеродром на водена површина, начинот на полетување, слетување, маневрирање и оперирање во границите на аеродромот на таква површина, како и местата, начинот и условите за слетување на хидроавион надвор од аеродромот на водена површина.

http://www.novamakedonija.com.mk/DetalNewsInstant.asp?vestInstant=12861