Паркирање и паркинзи (општо)

Градот Скопје Ве поканува на официјалното отворање на новото паркиралиште под Транспортниот центар што е закажано за утре /07.09.2010 година, вторник/ во 12:30 часот.

Новиот паркинг-простор ќе го промовираат градоначалникот на Град Скопје, Коце Трајановски, директорот на ЈП „Градски паркинг“, Борче Јакимовски и градоначалникот на општина Аеродром, Ивица Коневски.

Скопскиот „пајак“ месечно заработува 50.000 евра

Горан Адамовски

Сте го паркирале автомобилот каде што не му место, ама мислите дека ќе се извлечете. „Сигурно нема сега да дојде ‘пајакот‘, си викате додека ја заклучувате вратата. Но, по еден или два часа, ве чека шок. Најпрво се прашувате да не ви е украдено, а откако ќе се осигурите дека ви го зел „пајак’“, почнува кавга околу плаќањето. Многу мал дел од возачите признаваат дека погрешно паркирале и без приговор се фаќаат за џебот.

Шесте возила на „Пајак-службата“ вредно ги чистат скопските улици од непрописно паркираните возила, но и ги празнат џебовите на граѓаните. Едно возило - 2.000 денари. Ако го начекате „пајакот“ додека ви ја качува колата, ќе платите „само“ 1.200 денари.

Вредните „пајаци“ месечно стигаат до 50.000 евра заработка или околу 600.000 евра за една година.

Доколку сте паркирани на зелена површина - уште 1.500 денари, вкупно 3.500 денари. Од нив, претпријатието е должно 1.500 денари да ги префрли на „Паркови и зеленило“, чиј инспектор ја пишал казната, а со тие пари е предвидено да се озеленува околината. Но, и овие 3.500 денари ќе ви изгледаат одлично доколку не сте казнети со 250 евра од сообраќајната полиција, сума што се преполовува доколку платите во рок од осум дена.

Шесте возила на скопската „Пајак-служба“ вредно чистат низ улиците и по џебовите на граѓаните

„Интервенциите, дневни или неделни, зависат од доставените налози до ‘Сектор пајак‘, кои во просек се движат од околу 50 дневно“, велат од „Градски паркинг“, кој ја раководи „Пајак-службата“.

Простата математика вели дека минимум месечно се подигнуваат 1.500 возила што помножени со 2.000, дава вкупна сума од 3 милиони денари, или околу 50.000 евра.

„Нека прават пари, кој ни е крив што паркираме каде што ќе ни текне. Сакаме со кола да влеземе низ врата таму каде што сме тргнале“, велат дел од граѓаните.

Откако сообраќајниот полицаец или комунален инспектор (доколку возилото е паркирано на зелена површина или во близина на контејнер, како и хаварисано возило), а во одредени случаи и граѓани, извршители, фирми, напишат налог за непрописно запрено или паркирано возило, вработените во „Пајакот“ за миг го дигаат возилото. „Пајаците“ напаѓаат во две смени - од 7,30 до 21,30 часот, а во саботите од 9 до 1 часот по полноќ. Благајната, пак, работи без прекин во три смени.

„Во недела се работи само во случаи на повик, односно доколку интервенција на нашите возила е важна за проток во сообраќајот“, велат вработените во Службата.

Најчесто се подигнуваат непрописно паркираните возила во центарот на Скопје, односно делот од градот во кој има најголем метеж. При подигнување, возилата се фотографираат од сите страни како доказ за неправилното паркирање, како и заради можните постојни оштетувања на самото возило (гребнатини на каросеријата и сл.), кои, исто така, се впишуваат во налогот. Ова се прави од превенција во случај сопственикот да тврди дека возилото му е оштетено при транспорт до Депото на Службата.

„Има случаи и кога возилото е правилно паркирано, но, во моментот попречува изведба на градежни работи, бележење, поставување хоризонтална или вертикална сигнализација, поради што возилата се преместуваат од безбедносни причини: на пример, заради чистење траса на странски претставници, дипломати итн...“, објаснуваат од „Градски паркинг“. Возилото најчесто се поместува неколку метри, но има и случаи кога овие возила се носат во Депото. Оваа „услуга“ не се наплаќа.

„Вакви случаи на преместување возила заради безбедносни причини по барање на полицијата или други органи, има од 700 до 1.000 отстранети односно, преместени возила“, тврдат од „Градски паркинг“.

„Пајак-службата“ располага со шест специјални возила: три постари, наследени од ЈП „Улици и патишта“ - Скопје и три нови специјални возила „пајак“, кои претпријатието ги набави со свои пари. Во наредната година се очекуваат нови набавки, што значи дека алармот кај возачите уште сега свети црвено. (Г.А.)

Рампата зад Градежниците повторно боде очи

Советникот Идриз Орана од ДПА бара Градот Скопје да ја спроведе сопствената одлука и да го отстрани нелегалниот паркинг со кој две години управува Општина Центар