Музејски комплекс „Македонска Борба“

Игор Чавески

Владата сериозно размислува да се повлече од намерата во историскиот музеј на ВМРО да бидат сместени восочните фигури на Мара Бунева и на Ванчо Михајлов, дознава „Време“ од извори вклучени во изработката на фигурите. Поради стравот дека експонирањето на овие личности, кои во македонската историја се оценети како контроверзни, ќе добие негативен публицитет во јавноста, Владата се наоѓа пред сериозна дилема за изборот на фигури кои треба да се најдат во музејскиот комплекс што се гради на кејот на Вардар. Во комплексот наречен „Македонска борба“, во кој ќе бидат сместени музејот на жртвите од комунизмот и музеј на ВМРО, ќе бидат сместени 105 восочни фигури на историски личности во периодот од Кресненското и Разловечкото востание се до 50-тите години на 20 век. Покрај фигурите на македонските револуционери Гоце Делчев, Ѓорче Петров, Даме Груев и Јане Сандански, ќе бидат сместени и фигури на личности кои имале негативна улога во македонската историја, како Борис Сарафов и Тодор Александров, но и на многу други. Сојузот на борци жестоко се противи во музејот да се најадат личности кои ја негирале македонската нација, како што е Ванчо Михајлов. Според борците, експонирањето на овие личности несомнено води кон тивка бугаризација на државата. - Сметаме дека во време на економска криза не треба да се градат музеи. Посебно се противиме во таков музеј да се најде една Мара Бунева, која важи за злосторник и која со своите дела и правела услуга на Бугарија, а не на Македонија - вели Благоја Чоновски од прилепската организација на Сојузот на борците. Свое место во музејот, како што неофицијално дознаваме, ќе се најдат и фигурите на Крсте Мисирков, Методија Андонов-Ченто, Александар Протоѓеров, Петар Поп Арсов, Димо Хаџи-Димов, Христо Татарчев и на Павел Шатев. Покрај нив, ќе има фигури на личности што не се од Македонија, но оставиле белег врз македонската историја. Такви биле српскиот крал Александар Караѓорѓевиќ, Михајло Ковачевиќ и Велимир Прелиќ, кои биле убиени од Македонци. Од Министерството за култура не откриваат кои се личности ќе се најдат во музејот, но велат дека намерата е комплексот да има образовна и едукативна мисија бидејќи во него ќе има и архивски материјали и книги од историјата на нашата земја. - Првите 40 восочни фигури се веќе готови, а во тек е изработката и на другите 65. Покрај историските поставки, во музејот ќе има восочни фигури на сите што оставиле трага во историјата на македонското револуционерно движење - велат од Министерството. Како што дознаваме, поголем дел од восочните фигури, кои се изработуваат во Киевскиот музеј во Украина, се веќе пристигнати во Скопје и се доработуваат во фирмата „Специјална опрема“. Се очекува целиот музејски комплекс кој ќе биде на површина од 2.500 квадратни метри да биде завршен до средината на годинава. Тогаш треба да дојдат специјално обучени луѓе од Украина за да ги одредат специфичните услови под кои треба да се чуваат фигурите.

Да се вратат моштите на Христо Татарчев

Владата да ги врати во Македонија моштите на првиот претседател на ВМРО Христо Татарчев од Торино, Италија, побара вчера ВМРО-народна партија.
- На денот кога се навршуваат 58 години од смртта на првиот претседател на ВМРО, сакаме да му оддадеме почит, а воедно и да ја потсетиме Владата на нашата иницијатива - изјави вчера Марјан Додовски, претседател на партијата.

Точно светот гради чуда но не со малку пари, стариот народен театар и музејов се проекти кои се многу поефтини од некои футуристички градби кои коштаат многу а можеш да ги видиш само во богатите европски метрополи во кои има премногу стари згради со куполи во готски стил па нормално сакаат да градат нешто далеку помодерно.