Кавадарци, 10 април (МИА) - Кавадарчани ќе добијат нов соборен храм, а за таа цел неодамна владиката Агатангел на градоначалникот Александар Панов му го претстави  проектот за новата црква. Се работи за повеќекорабна црква со камбанарија висока 25 метри, по проект од архитектонско биро од Кочани.

Новата црква е со поскромни димензии од претходната чии темели пред една деценија беа поставени на локација кај хотел „Фени“. Тогашната иницијатива за изградба на грандиозен соборен храм не се реализира поради обемноста но и поради неможноста да се најдат доволно финансиски средства за негова изградба.
        

Новата црква ќе се гради на истата локација, а наскоро треба да биде поставен и камен-темелникот. Во меѓувреме ќе се формира Одбор за изградба на црквата кој ќе биде задолжен за спроведување на активностите за реализација на проектот.

Во одборот покрај црковни лица ќе учествуваат и граѓани на Кавадарци. Од последната анкета во која покрај граѓаните кои би учествувале со скромни донации, интерес покажува и кавадаречката бизнис заедница која не ја крие подготвеноста за донации за градот да добие нова црква.бн/хс/16:40