ЈП "Паркинзи на Општина Центар" на последната седница на Советот на Општината посака во иднина, доколку се создадат финансии и услови за тоа, да го преземе зонското паркирање на територијата на Општината Центар воведено од ЈП "Градски паркинг" пред повеќе од половина година. Ваквата намера на општинското претпријатие е иницирана од револтот поради запоседнувањето од страна на ЈП "Градски паркинг" на пет општински паркинзи и три зонски паркиралишта на улиците "Орце Николов", "Ѓуро Ѓаковиќ" и "Ленинова". Според општинското претпријатие "Градски паркинг" ќарува од зонското паркирање на нивните улици.
Од претпријатието сметаат дека на тој начин ќе биде поправена штетата што и ја нанело градското претпријатие за паркирање на Општината.

За плановите на општинското претпријатие за паркирање биле информирани и градоначалникот Владимир Тодоровиќ, раководството на ЈП "Градски паркинг" и скопскиот градоначалник, кои неодамна одржале заедничка средба и постигнале начелен договор за примопредавање на ингеренциите на паркинзите.

Директорот на ЈП Паркинзи на "Општина Центар", Тоше Делјановски, истакна дека претпријатието допрва ќе ги направи комплетните анализи за имплементацијата на зонското паркирање. Тој вели дека моментално единствено е утврдено дека за воведување на системот ќе им бидат потребни околу 70.000 евра.

Инаку уште минатата година ЈП "Градски паркинг" покажа добра волја за остварување на идејата на општинското претпријатие, иако оттаму се сомневаат дека ЈП Паркинзи на Општина Центар" е финансиски моќно да го издржи проектот за кој се потребни поголеми средства од оние кои монентално може да ги собере општинското.

По десет автомобили за едно паркинг-место

Со најновите најави за изградба на осум катни гаражи, капацитетите за паркирање во централното градско подрачје ќе се зголемат за десет до петнаесет отсто

Јавните паркиралишта во центарот на градот имаат капацитет да примат помалку од една десетина од вкупно 104.008-те возила што се регистрирани во Скопје, според податоците со кои располага МВР. Двете јавни претпријатија за паркинг-услуги имаат одвај пет илјади места, од кои на „Градски паркинг“ се нешто повеќе од четири илјади, а на „Паркинзи на општината Центар околу 850. Нема податоци за тоа колкав вкупен капацитет имаат паркиралиштата со кои располагаат други фирми и институции, како јавното станбено претпријатие, големите трговски центри, Клиничкиот центар и други, за кои неодамна се расправаше и во градскиот совет, бидејќи речиси ниедно немало соодветна дозвола за работа. Но се претпоставува дека и со нив бројот на местата не стигнува до десет отсто од регистрираните возила.

Со проектот за изградба на осум катни гаражи, кој беше договорен завчера меѓу Владата, градот, општината Центар и Јавното претпријатие за стопанисување станбен и со деловен простор, капацитетите за паркирање во централното подрачје ќе се зголемат за 30 до 40 отсто. Оваа инвестиција вредна 25 до 30 милиони евра ќе донесе околу 3.000 нови места. Најголеми ќе бидат двете гаражи што му припаднаа на градот, таа кај „Лотарија на македонија“ со капацитет за 800 до 900 возила и до Старата железничка станица, за околу 1.000 возила. На локациите што ги доби општината, кај Државниот архив до МТВ и кај поранешната зграда на „Нова Македонија“ ќе може да се направат објекти за паркирање што ќе имаат по 400 места. На јавното станбено претпријатие му останаа четири места, двете до Телекомуникацискиот центар и по една кај театарот и кај Работничкиот универзитет. На нив, според директорот Владимир Бахчовановски, би можеле да се направат гаражи со вкупен капацитет за 1.300 возила, но ако се направат лифтови, тогаш ќе се добијат уште 500 места.

И досега се нудеа земјишта на приватни фирми и на бизнисмени за да градат катни гаражи, но интерес имаше само за огласите каде што маркичките имаа комбинирана намена, најчесто заедно со деловен простор. Потоа тие градби се претвораа во деловни, трговски или административни згради, чиј капацитет за јавно паркирање ги задоволува само потребите на самите нив. Но се поострата борба за слободно паркинг место натера и некои инвеститори да се пријават на тендери и да градат објекти исклучиво за паркирање. Еден од нив е Мите Јовановски, сопственикот на синџирот бензински пумпи „Макоил“, кој победил на две такви лицитации, па ќе гради подземна гаража на три нивоа за 225 возила под паркчето зад Собранието и надземна гаража за најмалку 250 возила наспроти Судската палата.

- Мислам дека изградбата на паркиралишта е добра инвестиција, бидејќи потребите се сé поголеми - смета Јовановски.

Монтажни паркиралишта како можно решение

Иако сé уште има слободни места каде што може да се градат катни гаражи, градоначалниците веќе почнаа да размислуваат и за монтажни паркиралишта, со кои барем двојно може да се зголеми капацитетот на постојните отворени паркинзи. Владимир Тодоровиќ од Центар уште во својата предизборна програма предвиде изработка на платформа покрај улицата Народен фронт, по целата нејзина должина. И Ивица Коневски од Аеродром најави дека секаде каде што има зонско паркирање во неговата општина треба да се направат и монтажни паркиралишта. Коце Трајановски смета дека тоа е идеја што треба да ја разгледаат сите градоначалници.

Монтажни паркиралишта кај нас може да прави фирмата „Факом“, која изработува предмети од челик. Златко Симоновски, претставник од оваа фирма, вели дека ќе може да направат десет вида вакви платформи, а тие ќе може да собираат од 40, па сé до 248 возила, а би се поставувале на површини од 1.072 до 6.034 квадратни метри. Според Симоновски, ова решение е многу поевтино и попрактично отколку изградба на трајни објекти, за што би биле потребни и по две години.

- Монтажните паркинзи може да се постават на секое место каде што има доволно простор. Најголемата предност им е тоа што ако дојде до промена на деталниот урбанистички план, тие многу лесно би се демонтирале и би се наместиле на друга локација, а со тоа ќе се заштедат и време и пари. До сите градоначалници веќе испративме елаборати за монтажните паркинзи, па се надеваме дека наскоро ќе почнеме да ги изработуваме - објаснува Симоновски.

Вкупно 19 јавни паркиралишта работат без дозвола од градот

Некои доставиле комплетна документација за да добијат одобрение за јавно паркирање, за две во тек е постапка да им се издаде таков документ, а за четири не се знае ниту кој стопанисува со нив

Паркирање за пари кај „Б. Трајковски“