Со поништувањето на Деталниот урбанистички план за кој треба да расправаат советниците на општина Центар и поради што седницата беше неколку пати блокирана и одолговлекувана, постои можност Градскиот трговски центар да се спаси од барокизацијата која му е предвидена и за која е веќе избрано идејното решение. ГТЦ треба да добие фасада во неокласичен стил, да се надогради со уште еден кат и со реконструкцијата да се измени во затворен тип на трговски центар, но актуелните власти на Центар имаат намера да го спречат тоа. Советниците ни потврдуваат дека ако се поништи актуелниот ДУП и ако се врати на сила претходниот, тогаш ќе го снема планот за надградба на ГТЦ и за целосна промена на фасадата, па според претходниот Детален урбанистички план, овој објект кој се наоѓа на површината на Мал Ринг, ќе се врати во својата првична верзија.
Советникот од СДСМ, Јован Тагасовски, вели дека постои надеж за ГТЦ со оглед на тоа што во Советот членовите од оваа партија се мнозинство, но дека, сепак, е неопходна поддршка од други субјекти.
- Бараме помош и поддршка од Асоцијајцијата на архитекти, како и од целата македонска интелигенција да се спаси Центар. Да не остане општината на такви личности кои ја злоупотребуваат за партиски цели - изјавува Тагасовски.
ГТЦ е дел од Мал Ринг за чие уредување Советот треба да расправа, но процесот на враќање на претходниот ДУП е неизвесен поради честите блокади на седницата организирани од група демонстранти, но и од долгите амандмански расправи на советниците од ВМРО-ДПМНЕ.
Изминативе денови и градоначалникот, Андреј Жерновски, потврди дека е можно да се спаси ГТЦ од барок, но дека тоа ќе зависи од работата на општинскиот совет.
Во меѓувреме и дуќанџиите на трговскиот центар изразуваат револт затоа што не се консултирани од страна на управата при одлуката за промена на ГТЦ и при изборот на идејното решение. Велат дека никој не ги известува за тековните случувања и дека информациите ги добиваат единствено од медиумите.
Поголем број од нив не се согласуваат објектот да се затвори затоа што, велат, на тој начин ќе се намали протокот на луѓе со што бизнисот ќе претрпи негативни последици. Во врска со барокното идејно решение велат дека тоа е неразумно и дека така се губи духот на зградата препознатлива за Скопје.
- Затворањето на ГТЦ би значело смрт за локалите, подобро уште веднаш да ги затвориме вратите на локалите и да си одиме дома. Тука човек не би поминал ако се затворат премините - вели менаџер на еден бар во внатрешноста на ГТЦ, кој ја работи оваа работа 15 години.
Локалите кои се наоѓаат во внатрешноста на ГТЦ би имале уште еден проблем бидејќи ќе мора да го почитуваат Законот против пушење во затворени објекти, со што значително би опаднала посетеноста. На удар на оваа идеја се и дуќанџиите кои се сместени на премините.
- Низ овие премини секојдневно проаѓаат многу луѓе кои застануваат на излозите и влегуваат внатре. Од нив нѝ зависи целиот бизнис. Мислам дека ќе се загуби духот на трговскиот, овој центар работи на друг систем, сметам дека не е добра опција. Протокот на луѓе ќе се намали. Ниту е добро решение да се промени фасадата во таков стил, сметам дека изгледа многу лоша еден гломазен објект да го добие тој изглед - вели вработена во еден од бутиците која работи таму седум години.
За промената на ГТЦ реагираат архитектите, здруженијата, невладините организации и граѓаните. Овој петок пред објектот ќе се одржи и протест против оваа одлука организиран од Асоцијацијата на архитекти на Македонија. Поддршка за протестот даде и градоначалникот на Центар, Андреј Жерновски, а од асоцијацијата побараа поддршка и од градоначалникот на град Скопје, Коце Трајановски, кој денеска на прес-конференција одби да одговори каков е неговиот став за протестот.
Град Скопје, инаку, на почетокот на месецов распиша нов конкурс за идејно фасадно решение на петте кули кои се наоѓаат во непосредна близина на ГТЦ. Претходниот конкурс е потпишан затоа што комисијата не го одобрила единствениот труд кој бил во барокен стил. Според Минас Бакалчев, професор на Архитектонски факултет и член на комисијата, ќе биде прифатено она решение кои ги задоволува сите услови на планската разработка без разлика во каков стил ќе биде, но, додава тој, препорачливо е објектите да си го задржат првичниот изглед.
- И кулите и ГТЦ се значајни објекти за историјата на градот. Се работи за клучен комплекс на еден период кој ја означи историјата. При обновата, како архитект, сметам дека треба да се држат до првичната идеја, реконструкцијата треба да личи на она што било. За ГТЦ ставот е идентичен како за кулите. Во однос на архитектурата овој објект е поорганизирано врзан за градот и неговата промена бара поголем ангажман од граѓаните. ГТЦ е врвно уметничко и архитектонско ремек дело на едно време и треба да го задржиме неговиот автентичен изглед - смета Бакалчев.
Кулите, инаку, се изградени пред 1963 година и го преживеале земјотресот што го разурнал речиси целиот град. Тие се дело на архитектот Александар Серафимовски. Подоцна, на почетокот на седумдесеттите, на просторот е додаден и објектот на ГТЦ, а Живко Поповски е автор на идејното решение кое за многу стручњаци е достигнување во македонската архитектура.

Маја Васева