Мал Ринг

ДУП-от за Малиот ринг пред Уставен

Миле А. Ристески	Коментари (0)

Пред Уставниот се уште две иницијативи во однос на плоштадот, односно за градењето црква

Центарот на Скопје, Малиот ринг, повторно пред уставните судии. Во следниве месеци Уставниот суд ќе ја проверува постапката на донесувањето на Деталниот урбанистички план од општина Центар.

Ова не значи поведување на постапка, туку проверка на фактичката состојба при носењето на ДУП-от.

Подносителите на иницијативата до Уставен забележале дека немало јавна презентација и анкета по нацрт планот, рокот за презентација не бил во законскиот рок од 10 работни денови, а дека и во постапката на носење на одлуката со која е изгласан ДУП-от, не било консултирано посебно координативно тело.

Сето ова Уставниот суд ќе го испитува во наредниот период, по што треба да следи одлука дали ќе го стопира реализирањето на Деталниот урбанистички план за Малиот ринг.

На овој потег предвидено е да се градат црква, музеј, Архив на Македонија, но и зграда на Уставниот суд.

Со тоа какви видови објекти ќе се градат во овој случај, Уставниот суд не се занимава. Засега во судот резервирани за понатамошните нивни одлуки по ова прашање.

Доколку уставните судии изразат сомневање во постапката на општина Центар за ДУП-от и донесат одлука за укинување на урбанистичкиот план, консеквенцата од сето тоа би било предвидените објекти воопшто да не се градат.

Пред Уставниот се уште две иницијативи во однос на плоштадот, односно за градењето црква.

Едната, која бара да се поништи проектот на Владата како неуставен за финансирање на црква и фаворизирање на една религиска заедница, а втората иницијатива е оценување на уставноста на потегот на општина Центар со која на Владата и отстапи земјиште за таа да гради црква.

Кон крајот на март дојде и до физичка пресметка на плоштадот, кога две групи граѓани се пресметаа меѓу себе.

Едните беа ’за‘, другите ’против‘ изградба на црква на плоштадот. Тогаш политичката дебата за црквата се претвори во делење шлаканици и клоци за сите што мислат поинаку.