Елена Мачевска


Гребнатини на каросеријата и скршени ретровизори се најчестите оштетувања што се случуваат на автомобилите кога ги крева „Пајак- службата“. Граѓаните признаваат дека поради недостиг од доволно паркиралишта низ градот, но и поради прескапото паркинг-место, некогаш свесно ги паркираат возилата на недозволени површини, ризикувајќи да бидат казнети. Но казната е едно, велат, а оштетеното возило сосема друга работа, а често се случува поради невнимателноста при товарање да се случи штета на автомобилот. Во тој случај покрај сумата што ја плаќаат на ЈП „Градски паркинг“ и казната што им ја пишува полицијата, мора да издвојат и за поправка на возилото бидејќи ретко можат на надлежните во „Пајак-службата“ да им докажат дека тие им го оштетиле автомобилот. - Поради неправилно паркирање во центарот на градот, службата ми го собра автомобилот. Кога отидов да си го подигнам, на вратата имаше сериозна гребнатина, но оттаму не ја признаа вината, туку рекоа дека сигурно од претходно ми била гребната “ вели скопјанец, кој живее во Ѓорче Петров. Сепак, има и граѓани кои велат дека поправките на оштетените возилата им ги покрило јавното претпријатие. Од ЈП „Градски паркинг“, во чијашто надлежност е „Пајак-службата“, велат дека многу ретко се случува да го оштетат возилото што го креваат. Според нив, во просек само по пет возила годишно се оштетуваат при товарење, а за поправката на возилото доколку е мала штетата плаќа самото претпријатие, а доколку станува збор за поголема материјална штета, тогаш осигурителната компанија која претпријатието ја избрало на тендер. - На почетокот на секоја година распишуваме тендер за избор на осигурителна компанија која ги покрива трошоците околу поправката на возилата оштетени од наша страна. Сепак, за помали оштетувања плаќа самото претпријатие “ објаснува Ана Витановска, портпаролка на ЈП „Градски паркинг“. Таа вели дека сопствениците на неправилно паркираните возила кои биле отстранети со „Пајак-службата“, немаат можност за манипулација затоа што, како што тврди, пред да биде подигнат автомобилот, сообраќаен полицаец или комунален инспектор прави записник дали има претходно некои оштетувања или не. Инаку, казната којашто треба да ја плати сопственикот за кренато возило е 2.000 денари, а ако сопственикот на возилото дојде во моментот кога возилото се товара и веднаш плати за направениот прекршок, тогаш цената е 1.200 денари. За подигнато возило од зелена површина се плаќа 3.500 денари. Во моментот ЈП „Градски паркинг“ располага со шест возила. Според одговорните од Град Скопје, до крајот на идната година, предвидено е да се набават нови, со што ќе се зголеми ефикасноста на службата.

Во општина Аеродром паркинг-места за лицата со хендикеп

Општина Аеродром почна да обележува паркинг-места за инвалидизирани лица, а интензивно работи и на подготовка на проект за пристапни рампи.

Заменик-министерот за труд и социјална политика, Спиро Ристовски, на вчерашната прес-конференција рече дека Аеродром е прва Општина која почнува ваков проект и ги повика градоначалниците на другите општини да го следат примерот. Градоначалникот на Аеродром, Ивица Коневски, истакна дека се настојува предизборните ветувања за лицата со хендикеп целосно да бидат реализирани.

Акцијата за обезбедување места на паркинг-просторите и проектот за пристапност со кој треба да се надминат архитектонските пречки ја поздрави и претседателот на „Полио плус“, Звонко Шаврески. „Добро е што градоначалникот не' повика да се вклучиме директно во реализацијата на овој проект за да помогнеме каде и како да се направат тие места“, рече Шаврески, потенцирајќи дека не е доволно само да се обезбедат паркинг-места за лицата со хендикеп, туку дека пристапот до нив треба да биде лесен, а возачите да ги почитуваат обележаните делови.

Во „одбраната“ на местата од несовесните возачи ќе бидат вклучени подрачните единици на МВР. Покрај казните, на решавање на проблемот ќе се работи и едукативно со плакати и летоци. (МИА)

http://www.utrinski.com.mk/?ItemID=4E8966EA1B12FF438BD3FE6F0A889AFA

Општина Центар незаконски наплаќа паркирање кај „Аутомакедонија“, кај „Зелен пазар“ и зад зградата на „Трготекстил“, тврдат жители од станбениот блок Градски ѕид. Тие дознале дека градскиот инспекторат до претпријатието „Паркинзи на општина Центар“ доставил решенија за уривање на рампите на овие три локации. За граѓаните е спорна сопственоста на земјиштето на кое се ставени рампите и велат дека не се почитувани сите законски процедури. - Не може да се узурпира земјиште кое досега било слободно. Така секој ќе почне да си става рампа каде што ќе му текне. Ако земјиштето е државно, државата треба да даде дозвола за да има паркиралиште или не. Згора на тоа, одземаат пристапни улици и ги затвораат со рампи, а го ограничуваат и пристапот кон подземните гаражи, кои се наши. Тоа е исто како да имаш куќа и некој ти го затвори патот до дома - вели еден од жителите. Од јавното претпријатие ги отфрлаат обвинувањата дека незаконски работеле. - Некој си земал за право да создава проблеми, па си лепел плакати по зградите со информациите дека треба да ни ги урнат рампите. Но тоа не е точно, поради ваквите случаи кај нас веќе дојдоа од МВР да ги прегледаат документите, но не најдоа ништо спорно, ги имаме сите потребни дозволи и регистрација за подружницата “ вели Тодор Делјановски, директор на „Паркинзи на општина Центар“. Тој објаснува дека спорна е само улицата кај Домот на градежниците, за која уште немаат дозвола, па затоа и не почнале со работа, иако опремата е поставена. Според него, Градот воопшто не бил надлежен да ги урива рампите доколку тие се дивоградби, туку Општината. Како што вели, веќе го известил градоначалникот Владимир Тодоровиќ за ситуацијата. Градоначалникот ветил дека ќе го реши проблемот со Градот и дека ќе одржи заедничка средба на која ќе се распределат паркиралиштата меѓу Градот и Општината. Од Град Скопје одговараат слично “ проблемот го наследиле кога дошле на власт и ќе бараат заедничко решение. - Трите јавни паркиралишта се проблеми со кои се соочија новите градоначалници на град Скопје и на општина Центар. Веднаш се ставени на дневен ред затоа што се од големо значење за граѓаните и затоа градоначалниците Трајановски и Тодоровиќ наскоро ќе излезат со решение “ велат одговорните од Град Скопје. При крајот на мандатот на Трифун Костовски и на Виолета Аларова, постоеше вистинска војна за паркинг-просторот во градот. Тогашните власти неколку пати ги тргаа рампите на паркиралиштата спроти „Алумина“ во Капиштец, кај „Трготекстил“ и во близина на Домот на градежниците. Образложението од двете страни беше исто “ опремата не била законски поставена.

Роза Петкова

„Градски паркинг“ ќе ги управува паркиралиштата пред четирите бели згради во населбата Капиштец, лоцирани спроти зградата на „Нова Македонија“, и ќе им наплатува за паркирањето на станарите и на останатите граѓани. Од претпријатието велат дека се во завршна фаза и откако ќе изработат сообраќаен проект за просторот и ќе ги добијат потребните одобренија од Градот Скопје и од Советот, ќе почнат да работат. Извесен период „Градски паркинг“ преку соопштенија им ги нудеше своите услуги на станарите од зградите, а во последниот допис ги објави и цените кои ќе ги наплатува за паркирање. Така, едно возило месечно ќе ги чини станарите по 250 денари, а ако имаат две возила ќе треба да платат 500 денари. Понатаму во соопштението стои дека средствата што ќе ги собере „Градски паркинг“ ќе ги искористи за да ги покрие трошоците за работа, како плати на вработените, струја и греење, а никаде не се споменува дека претпријатието ќе инвестира во уредување на просторот, ниту дека ќе им обезбеди слободно место на станарите. Надлежните дури се потрудиле да им остават и примерок од барање на жителите од зградите кое тие би го пополниле и пратиле до Градот, Советот, Секторот за сообраќај и до „Градски паркинг“ за да се потврди дека иницијативата за затворање на паркингот доаѓа од граѓаните. - Во преговори сме да го преземеме паркиралиштето на управување, имаме позитивни сигнали од станарите. Тие неофицијално прифатија, имаме потписи од претседателите на сите куќни совети “ објасни Владимир Кроневски од Секторот за јавни паркиралишта на „Градски паркинг“. Наспроти тоа, повеќето од станарите не беа информирани дека паркиралиштето ќе им се затвори, ниту дека тие дале согласност за тоа. Проблем со паркирањето имаат и жителите од уличката кај кафулето „Пјаца либерта“, каде што Општина Центар пред повеќе месеци постави наплатни рампи. Опремата за затворање на паркинг-просторот поставена без дозволи од МВР и Градот беше отстранувана неколку пати, а општинарите повторно ја враќаа. Иако пред извесно време надлежните од ЈП „Паркинзи на општина Центар“ велеа дека ќе добијат дозвола, тоа не се случи, а рампите си останаа. - Работата е статус кво затоа што треба некои работи да се решат меѓу Градот и Општината. Дозвола за опремата се уште не добивме ниту од МВР, ниту од Градот. Во секој случај штом го добиеме одобрението, можеме веднаш да почнеме со работа, се е поставено, само треба да се извршат приклучоците “ вели Тодор Делјановски, директор на претпријатието. Станарите од околните згради тврдат дека од „Паркинзи на општина Центар“ веќе им ги соопштиле и цените по кои ќе им се наплатува паркирањето. - Ни рекоа дека ќе понудат цена од 236 денари месечно за паркирање и дека сигурно ќе има слободни места за станарите, а нема да пуштаат други да се паркираат. Но ние им кажавме дека земјиштето е наше и ние си плаќаме за него, па ако немаме каде да се паркираме, ќе се собереме и ќе им ги скршиме рампите “ вели Светлана, една од станарите на зградите кај Домот на градежниците. Според жителите, улицата се уште не се затвора затоа што општинарите кои ги поставија рампите не оставиле доволно место за да помине пожарникарско или друго поголемо возило. Од Град Скопје не одговорија зошто не ги отстрануваат рампите ако тие се непрописно поставени.

Шлепери ги претвораат улиците во диви паркиралишта

Градските власти досега не успеаја да изградат посебни паркинзи за шлепери

Шлеперите и тешките камиони, иако е изградена обиколницата, се' уште јуришаат по скопските улици. Опасни се за возачите, за пешаците, го загадуваат воздухот во градот и ги оштетуваат улиците, поради нивната голема тежина. Дополнителен проблем на граѓаните им предизвикува навиката на возачите да ги паркираат шлеперите каде што ќе стигнат, создавајќи притоа диви паркиралишта од местата што се предвидени за прошетки и рекреација. На улица Љубљанска, во населбата Карпош 4, во близина на последната автобуската станица на линијата „15“ веќе два месеца дел од коловозот служи како паркинг за шлепери.

- Шлеперите се паркирани токму на аголот на „Љубљанска“ и „Илинденска“ и постојано ја блокираат прегледноста при минување на улицата кон ресторанот „Имес“. Често се случува улицата да е темна, поради дефект на уличното осветление, па проблемот воопшто не е за занемарување. Не е прегледно ниту за пешаците што поминуваат на преминот ниту за возачите што вртат кон „Илинденска“. Можеби тука живеат возачите на шлеперите, не знаеме. Знаеме само дека никој не ги казнува и не ги трга, а безбедноста во сообраќајот е сериозно нарушена - вели Игор М. од населба Карпош 4.

Паркиралиштата за тешки товарни возила се вечна скопска тема. Надлежните веќе десетина години ги најавуваат, но ниедна гарнитура досега не најде пари за да ги изгради. Според Генералниот урбанистички план на Скопје (ГУП), се предвидува тешките возила и автобусите да се паркираат на периферијата, односно на влезовите во градот, и тоа на четири локации - кај Момин Поток, во Железарница и на Качанички пат. Последната предвидена локација на булеварот Војводина веќе се користи како паркинг, но со неа стопанисува приватна фирма. Имаше идеја во изградбата на другите паркинзи за камиони да се вклучат и Јавното претпријатие „Градски паркинг“ и приватни фирми, но ништо не излезе од оваа замисла.

Од Град Скопје велат дека веќе постои строг режим за движењето на тешките товарни возила. Во централното подрачје не е дозволено да минуваат камиони што се потешки од 3,5 тони. Оние што се полесни од оваа тежина, а кои служат за дотур на стока во продавниците, смеат да се паркираат низ центарот само со специјални одобренија од Секторот за сообраќај на Град Скопје. Возилата над 5,5 тони можат да возат само до границите со Малиот ринг, а потешките шлепери од 12 тони смеат да минуваат само по магистралните патишта, до границите со булеварите 8 септември и Србија.

- Градоначалникот Коце Трајановски му посветува посебно внимание на ГУП-от на Град Скопје, како основен документ со кој се регулираат урбанистичкиот, сообраќајниот и економскиот развој на градот, како и заштитата на животната средина. Стационарниот сообраќај на тешки товарни возила е дел од таа генерална опсервација на ГУП-от и ќе се бара решение во зависност од финансиските услови. Ова прашање ќе биде третирано во наредниот период - изјавија од градското Одделение за односи со јавност. Од Секторот за внатрешни работи - Скопје велат дека полицијата редовно ги казнува возачите кои не го почитуваат сообраќајниот режим.

- Ги казнуваме оние што ги паркираат своите камиони во центарот на Скопје и оние што носат поголем товар од дозволеното. Ако граѓаните забележат појава на дивопаркирани тешки товарни возила што им го блокираат патот или паркингот, слободно може да се јават кај нас и да пријават. Полицијата постапува по повик на граѓаните - вели Лиза Бендевска, портпаролка на СВР-Скопје.

Јорданка Ивановска