Јавен автобуски превоз (општо)

ЈСП доби нови автобуси, а остана со стари поништувачи за билети

Неодамна на старо повторно биле купени над шеесеттина слични апарати за читање на картите

Бојан Шашевски

Иако низ градските улици одамна сообраќаат нови автобуси со исправен мотор, амортизација, греење, камери, со мирис на ново и свежо, сепак, осовременувањето на јавниот превоз не ги зафати старите и често нефункционални поништувачи на билети.

Апаратите за читање на автобуските картички на ЈСП буквално се крш. Постојано даваат црвен сигнал „во дефект“, па возачите се принудени да ги потчукнуваат или рестартираат за да проработат, а патниците се возат со преполовени и искинати билети. Некои граѓани се жалат дека апаратите упорно им ги „јадат“ картичките. Неисправните поништувачи создаваат редици луѓе во автобусот, бидејќи патниците се принудени да чекаат возачот сам да го поништи билетот. Многу често се случува на картичката воопшто да не се познаваат отпечатените бројки и датумот на возењето, податоци што треба да ги прегледуваат контролорите.

„Пред неколку дена, не знам по кој пат, повторно ми ’отидоа’ неколку возења во автобус. Регуларно ја ставив и отчукав картичката во апаратот, но откако забележав дека е закочен, ја повлеков назад и видов дека од едната стана е целосно искината. А имав уште за пет возења. Освен што картичката редовно ми ја кине возачот, сега почнаа и самите автомати да ги уништуваат“, револтирана е Весна Маневска од населбата Аеродром.

Слично искуство имал и Сашо Најдевски од Тафталиџе 2. Тој вели дека поништувачите на билети се тотално застарени и неупотребливи, па при честите турканици патниците многу лесно ги докршуваат и демолираат.

„Не ми е јасно како може во вакви нови автобуси се' уште да функционираат ’антички‘ и распаднати автомати. Поништувачите се крш. Единствено се корисни за исфрлање на фрустрациите на граѓаните. Особено е тензично кога ќе се расипат во двокатен автобус. Тогаш сите му викаат на возачот, а тој воопшто не ги ни слуша од затворената вратичка“, вели Најдевски.

По неколкугодишни најави и неуспешни тендери, ЈСП „Скопје“ при крајот на август, конечно, избра фирма која ќе инсталира електронски апарати за наплата, автомати за издавање и дополнување билети што ќе бидат лоцирани на автобуските постојки во градското подрачје, како и можност за поставување џи-пи-ес уреди за автоматска локација на возилата. Но, додека граѓаните чекаат на чип-картичките од словенечката фирма „ЕМ тест“, а ЈСП со моменталниот платежен систем троши по околу 10 милиони денари годишно за хартија за печатење, се' уште, барем до септември, нема можност да се воведе безготовинско плаќање во автобусите.

„По конкурсот за јавно приватно партнерство, избравме една фирма, а дел од останатите четири конкуренти поднесоа тужби кои најрано до септември треба да поминат низ Управниот суд и Второстепената комисија“, вели Мишо Николов, директорот на ЈСП. Тој потврдува дека претпријатието периодов на старо повторно купило над шеесетина слични поништувачи на билети, но овој пат не била избрана италијанската фирма која ги изработуваше претходните апарати.

„Ќе се користат и овие автомати. Многу подобри и пофункционални се од претходните. Ги набавивме колку да преживееме и да одговорат на потребите на автобусите. Инаку, поправката на старите поништувачи не е премногу скапа. Имаме посебна служба која се грижи за нив, а годишно издвојуваме околу 5.000 евра за сервисирање на апаратите“, вели Николов и додава дека кога ќе дојде време, таканаречениот смарт (паметен) систем на наплата со електронски билети ќе биде инсталиран на 270-280 автобуси.