Зградата, која се гради во неокласичен архитектонски стил, во која ќе бидат сместени Државниот архив, Археолошкиот музеј и Уставниот суд, може да се каже дека се привршува со голем интензитет, особено ако се земе предвид комплексноста на објектот што вклучува две подземни нивоа за паркирање, 40 надворешни бетонски столбови, релјефи на тимпанонот и осум надземни ката.

Директорот на владината служба за општи и заеднички работи, Васе Доневски, вели дека доколку градежниците ги послужат временските услови, оваа монументална градба ќе биде завршена најдоцна до јануари следната година, но, сепак, дотогаш нема да биде готов подземниот паркинг наменет за вработените во администрацијата.

- Засега сè оди според предвидената динамика и без некои проблеми, но, сепак се работи за монументален и комплексен објект и не може прецизно да се предвиди рокот кога точно зградата ќе биде завршена. Се надеваме до крајот на годинава или евентуално на почетокот на следната - вели Доневски.

Градбата ќе има корисна површина од 13,5 илјади квадратни метри. Првите четири ката се предвидени за Археолошкиот музеј, над него ке биде сместен Уставниот суд, а последниот кат е резервиран за Државниот архив. 
Според официјалните финансиски извештаи, изградбата на објектот ќе чини околу 25 милиони евра, што се обезбедуваат од државниот буџет, а само за илуминацијата на зградата, која ќе биде осветлена во природно бела боја, ќе се потрошат околу 550.000 евра.

Многу веројатно е во истиот рок да се заврши и изградбата на објектот во кој ќе биде сместено и Министерството за надворешни работи, иако неговата изградба почна нешто подоцна, но се гради со најбрзо темпо споредено со другите градби од проектот „Скопје 2014“.
Сообраќајната инфраструктура на сите нови објекти на левиот брег на Вардар ќе се решава и со изградбата на подземната сообраќајница која ќе поминува токму покрај кејот на реката, а треба да почне да се гради во 2013 година. Подземниот тунел кој според студијата ќе чини околу 30 милиони евра, ќе ги поврзува булеварот Кузман Јосифовски – Питу со булеварите Илинден и Партизански одреди. Предвидени се и два кружни тека каде што ќе се понира и излегува од подземната сообраќајница, кај мостот „Гоце Делчев“ и на почетокот на булеварот Кузман Јосифовски Питу, во близина на Мостот кај МАНУ. 

ГМВ/БИ