Од регионот

Холандската компанија „Витал Естејтс“ планира изградба на ротирачка кула висока 80 ката во Нов Белград, објави белградскиот весник „Данас“, нагласувајќи дека градските власти на Белград засега се уште не дале дозвола за градба на овој објект.

Според планот за изградба на зградата, се предвидува секој кат да е со површина од околу 1.200 метри квадратни, а за нејзино ротирање ќе се користи соларна и еолска енергија. Секој кат индивидуално би требало да се врти околу оската на кулата, така што зградата цело време би изгледала различно. Предвидено е во зградата да има хотел, деловни простории и станови.

Според претставникот на „Витал“, Зоран Лукиќ никаде во Европа досега не е изградена ваква „ротирачка кула“ и таа би можела да стане нов симбол на Белград.

Лукиќ нагласува дека проектатант на кулата е светски познатиот архитект Дејвид Фишер, кој е автор на ротирачкиот небодер во Дубаи.

Според Лукиќ, за изградба на „ротирачката кула“ би се користел „бетон од новата генерација, кој е шестпати полесен од стандардниот“. - Материјалот овозможува целосна енергетска независност на зградата, создава можности за иновативно загревање и разладување, при што се штеди до 70 проценти енергија, тврди Лукиќ.

„Витал Естејтс“, чие седиште е во Амстердам, е дел од швајцарскиот инвестициски холдинг „Витал Сорс Парадизо“, кој е познат по иновациите во областа на градежништвото. Оваа компанија во моментов гради 220-катна зграда во Бразил, која би требало да биде готова до стартот на Светското фудбалско првенство што во 2014 гппдона ќе се одржи во оваа земја. Овој облакодер треба да биде највискоа зграда на американскиот континент.