Пешачки зони и помали плоштади (општо)

СЕ ГРАДИ НОВА УЛИЦА ВО ОKОЛИНАТА НА ПЛОШТАДОТ МАKЕДОНИЈА

„Максим Горки“ ќе излегува на Kеј

Градежните активности на улицата ќе завршат до јуни годинава, по што ќе се засадат и јапонски цреши

До јуни годинава, една од најстарите улици во центарот и во Скопје, Максим Горки, ќе добие свое продолжение до Kејот на Вардар, најавуваат општинските власти. Kракот во моментов е во изградба и неговата должина ќе изнесува 253 метри. Новопроектираната улица ќе почнува кај Еуростандард банка, која се наоѓа на истоимената улица, а ќе завршува кај новата катна гаража на МЕПСО.

Се работи за крак чија изградба се најавуваше уште пред десетина години. Почетокот на примарната сообраќајница Максим Горки е кај „Kингбургер“ и продолжува с` до плоштадот Македонија, но преку Градски ѕид, каде што се сече со улицата Даме Груев.

- Планирано е дел од улицата да биде за возила, а дел да биде пешачка. Нејзината изградба чини околу 7,5 милиони денари - објасни Јовица Ацковски, портпарол во Општина Центар.

По завршувањето на градежните работи на улицата ќе биде формиран дрворед од јапонски цреши, рече тој, не откривајќи за колку садници ќе стане збор, како и колку ќе чини нивната набавка. Дрворедот според објавениот оглас ќе биде од дрвја со цветни крошни од видот „лагерстроеми аиндициа“.

- По завршување на јавната набавка јавноста ќе биде информирана за сите детали - одговори Ацковски.

Градежните работи на овој крак од „Максим Горки“ се почнати кон крајот на минатата година. Според информациите од Центар, освен проектирање и изградба на улицата, предвидено е и поставување и на комплетна инфраструктура, односно нова водоводна, фекална и атмосферска мрежа, како и поплочување на пешачките патеки со павер-елементи. (А.П.)

Нов парк и тревнати површини во Охрид

Охрид, 5. септевмри 2011 (ИНПРЕС)
извор: Супер радио фото: Супер радио

Локалната самоуправа од Охрид планира да ја прошири линијата на паркови и зеленило по крајбрежјето на Охридското Езеро.

Според градоначалникот Александар Петрески има широк и неискористен простор во централниот дел на градот, кој може да биде преуреден во парк.

Од завршувањето на третата плажа Горица, се до локацијата на дискотеката „Парк“ е идеален простор за преуредување во нов парк. Паркот  ќе почне да се уредува оваа есенска сезона. Ќе се продолжи линијата на единствениот градски парк кој го поседува Охрид, вели градоначалникот.

- Станува збор за една голема површина. Ќе направиме нов парк, затоа што овој кој го имаме е правен пред повеќе од педесет години и оттогаш наваму нема никаков нов парк во Охрид. Сигурно дека во оној дел кон плажата, ќе направиме и една слободна плажа, која ќе биде слободна, без наплата и без комерцијална употреба.

Постојаното укажување на охридските еколози за потребата од проширување на зелениот појас во строгиот, но и периферниот дел на градот, допреа до градските власти. Во светот постои тенденцијата на зголемување на зелените површини во центарот на градот, објаснува  Ѓоко Зороски, портпарол на Еколошкото друштво „Грашница“ од Охрид.

- Зелениот појас има мошне битна улога. Особено кога се урбанизира еден град, треба да се води сметка колкава ќе биде зелената површина спрема вкупниот број на жители.

Во централниот дел на градот оваа пролет  започна акцијата на сечење на старите липи. Новиот план проект предвидува садење на нови видови дрва, јапонски лигуструм, кој има плитки корени, а спаѓа во редот на ниски дрва. (Крај)