Владата ќе гради пруга кон Бугарија откако ќе и заврши мандатот

Во новата Национална програма за железничка инфраструктура 2011-2013 година почетокот на изградбата на пругата, која е дел од Коридорот 8, се предвидува во 2012 година, кога истекува мандатот на актуелната влада

Изградбата на пругата кон Бугарија ќе почне во 2012 година и се планира да заврши до 2018 година, предвидува Владата во новата Национална програма за железничка инфраструктура 2011-2013 година. Почетокот на изградбата на пругата, која е дел од Коридорот 8, е во истата година кога истекува шестгодишниот мандат на актуелната влада.

Во програмата се констатира и потребата за изградба на пруга кон Албанија, но освен тоа што се вели дека за овој проект е потребна подготовка на студија и дека изградбата би траела шест години, не е предвиден датум за почеток.

Македонија е една од ретките земји во Европа која нема железничка врска со две соседни земји (Албанија и Бугарија). Според процените дадени во националната програма, за да се реализира оваа инвестиција во инфраструктурата потребни се околу 845 милиони евра. Според процените на Владата, за изградба на источниот дел од Коридорот 8, односно пругата Куманово – Крива Паланка – Деве Баир (граница со Бугарија) во должина од 89 километри потребни се вкупно 480 милиони евра. За изградба, пак, на пругата Кичево - граница со Република Албанија во должина од 70 километри потребни се околу 300 милиони евра. За целосно да профункционира железничката врска Албанија - Македонија - Бугарија потребна е реконструкција и на пругата Кичево - Скопје – Куманово, што би чинело 65 милиони евра.
Владата планира поголем дел од овие пари да обезбеди преку задолжувања, грантови и од фондови, а само мал дел од финансиската конструкција за изградба на пругите е предвидено да се земе од државниот буџет. Иако се потребни огромни средства за доизградба на пругите по должината на Коридорот 8, Владата планира за реализација на националната програма во наредните две години да потроши околу 100 милиони евра, од кои многу мал дел ќе биде наменет за реализација на проектите од овој коридор.

Итен ремонт или ограничување на брзините

На повеќе делници од Коридорот 10 последен пат ремонт им бил извршен пред повеќе од 30 години, додека на пругите од Коридорот 8 последен пат ремонт бил извршен пред 40 години. Во програмата се констатира дека станува збор за очајна состојба.

„Поради тоа што инвестициското одржување во последните декади било вршено со многу мал интензитет, се наметнува потребата од негово значително зголемување или ќе биде потребно да се воведат ограничувања на брзините на делници во блиска иднина“, се вели во програмата.

Во Владата констатираат дека најголем број делници се со животен век на колосекот кој се приближува кон 40 години (околу 100 км) и доколку нема поголеми инвестиции во иднина, трошоците за одржување би се зголемиле значително. Поради тоа, во наредниот период се планира ремонт на пругите по Коридорот 10 и тоа на делниците Табановци - Куманово, Ногаевци - Неготино и Миравци - Смоквица, како и реконструкција на железничката пруга Битола - Кременица.

Карактеристики и последна година на ремонт на пруга по Коридорот 8

   Делница                   должина    старост    последна година на ремонт

Ѓорче Петров - Тетово     41,8            41          1968
Тетово - Гостивар            24,4            41          1968
Гостивар - Кичево           36,6            40

Старост на делови од колосекот по Коридорот 10

   години километри дел од Коридорот 10

40-46           52                 24,6%
30-39          117                54,4%
20-29           27                 12,6%
10               18                  8,4%