Јавен автобуски превоз (општо)

Оваа Владина одлука е донесена деновиве на барање на превозниците во патниот сообраќај, бидејќи возниот парк им е во катастрофално лоша состојба и е стар повеќе од 30 години

Од декември годинава до крајот на април 2012 превозниците ќе можат повторно да увезуваат употребувани минибуси и автобуси со еуро 2" стандард. Оваа Владина одлука е донесена деновиве на барање на превозниците во патниот сообраќај, бидејќи возниот парк им е во катастрофално лоша состојба и стар повеќе од 30 години.

Според Горан Трпковски, претседател на Здружението на превозниците во патниот сообраќај, со минибусите и автобусите со еуро 0" и еуро 1" стандард им се ограничува обемот на работа само во домашниот сообраќај, оти со ваков низок стандард што не е еколошки не можат да возат во странство, а ако сепак возат тогаш превозникот плаќа одредени пенали.

-Со оваа владина одлука која е за поздравување ќе можеме да ги обновиме возилата со еуро 2" стандард, а по две до три години и со еуро 3" стандард - смета Трпковски. Тој потсетува дека лани Владата им дозволила да обезбедат употребувани возила од категоријата М2 и М3 со еуро 2" стандард, како што се минибуси и автобуси. Во периодот од 6 месеци, односно во два наврати по 3 месеци колку што траела дозволата, биле купени околу 1.000 автобуси и минибуси. Трпковски очекува до крајот на април идната година да бидат купени уште 600 возила од оваа категорија.

Според информациите на Царинската управа на РМ до октомври годинава купени се само 124 употребувани автобуси и минибуси, а нови 156 возила.
Според Златко Кочовски, управител на СИЗ Македонија сообраќај" - АМЕРИТ, токму овие бројки покажуваат колку е добредојдена оваа владина одлука.

-До 30 април идната година ќе се овозможи значителен број од возилата кои се постари од 30 години, а се возат по нашите патишта да бидат заменети. Владата навистина ќе им помогне на превозниците со оваа поволност за тие да можат да земат кредит и да купат возила со еуро 2" стандард - вели Кочовски. Тој информира дека употребуван автобус од марката мерцедес" може да се купи по цена од 50 до 60 илјади евра, а нов таков автобус чини од 400.000 до 500.000 евра. Според него автобусите од другите марки можат да се обезбедат и поповолно.
Што се однесува, пак, до цената на минибусите до 19 седишта тие можат да се купат за 20 илјади евра, а оние до 30 седишта нови чинат околу 50 илјади евра.

Од Министерството за економија потврдуваат дека Правилникот за единечно одобрување на возило е донесен на барање на одделни здруженија на превозници и затоа со него до 30 април 2012 година ќе се овозможи бараниот увоз на употребувани возила од категоријата М2 и М3, односно минибуси и автобуси со еуро 2" стандард. Со правилникот ќе се овозможи и спроведувањето на постапката за единечно одобрување, односно хомологација на истите.
- Во согласност со Правилникот сите половни возила од категорија минибуси и автобуси кои што ќе бидат набавени треба да го исполнуваат еуро 2" стандардот за емисија на издувните гасови, а со тоа ќе се подобри значително заштитата на животната средина. Истовремено за околу 40 % ќе се обнови и релативно стариот возен парк на превозниците во патниот сообраќај кои вршат превоз на патници во земјава и во соседните земји - информираат од ресорното министерство.

http://vecer.com.mk/?ItemID=784F9D6FFA7F044290C5521D7099363E