Урбано дивјаштво

Безбедноста на кула во Капиштец заложник на каприците на еден станар

Бојан Шашевски

Станарите од зградата број 25 од улицата „Народен фронт“, во Капиштец, стравуваат за својата безбедност откако нивни соседи од 11. кат започнале да си го адаптираат станот и притоа планираат да избушат дел од заедничката просторија на катот која се користи како остава, а содржи делови од основното носечко бетонско јадро. Сметаат дека несовесните соседи, кои планираат од еден да направат два помали стана, со дупчење на армираното бетонско платно ќе ја доведат во критична состојба целата статика на шестнаесеткатната зграда. 

Загрижените станари досега контактирале повеќе архитекти и инженери. Им укажале на своите соседи дека централното плато е поврзано со главните станбени столбови и е нужно за прифаќање на латерални сили во случај на земјотрес. Но, како повратна реакција добиле исмевање. 

„Воопшто не ни е доставена техничка документација за станот, за кој тврдат дека се реновира, а не реконструира и дели на два дела. Во оставата за велосипеди прават влез за едниот стан. Во глава им е разубавувањето, а воопшто не им паѓа во глава што може да им се случи на сите останати жители на зградата“, велат револтираните станари, напоменувајќи дека проектантот и сопствениците на зградата постојано им даваат до знаење дека имаат доставено барање до Општина Центар за добивање на урбанистичка дозвола за градење 2 стана, но, таа наводно никако да стаса до нив. „Досега пративме жалба до Државната градежна инспекција, но, и барање до градежната инспекција на Општина Центар, но, работата продолжува активно да си тече. Откако ќе се пробуши, нема да може да се крпи јадрото! Кој ќе ја сноси целата одговорност доколку дојде до уривање на кој било дел од бетонското платно на овој објект?“, прашуваат станарите.

Дел од нив сметаат дека користењето на заедничката станбена квадратура од оставата претставува узурпација и се плашат дека ваквата појава ќе стане пример за други соседи и идна практика. „Ова е противречно со Законот за домување, кој предвидува постоење заеднички ходници, скали, тавани, подруми, засолништа, делови за домарска служба и слично, поточно, простории што и служат на населената зграда како целина. Плус, со адаптирањето на станот, за да си направат тоалет, во ентериерот ќе рушат и канали со инсталации од оџак и водоводна мрежа. Тоа е дополнителен проблем“, сметаат станарите од „Народен фронт“ број 25, кои од надлежните бараат на самото место да направат записник, а работата да се стопира се' додека соседите од единаесеттиот кат не ја достават бараната техничка документација. 

Општинарите од Центар не се запознаени со случајот. Градежниот инспектор, велат, досега не добил никакво барање за адаптација на станот, ниту, пак пријава од станарите кои стравуваат за безбедноста на зградата. „пред да се донесе каков било заклучок околу бушењето, узурпацијата и безбедноста на просторот, најпрво треба да се погледа работењето во станот. Од понеделник ќе го испитаме случајот“, најавуваат општинарите.

Кафеани проширени на сметка на статиката

Станарите од една зграда до „Мавровка“ се жалат дека кафеанџиите ги поткопале темелите

Снежана Калабакова

Станарите од трикатната зграда на булеварот „Крсте Мисирков“ број 57, веднаш до ТЦ „Мавровка“, се исплашени за својата безбедност, бидејќи дуќанџиите од приземјето презеле градежни зафати со кои ги поткопале темелите. Луѓето се жалат дека кафеанџиите зафатиле од потпорните ѕидови, а го узурпирале и заедничкиот простор пред станбениот објект со цел да си ги прошират локалите. Со ваквата узурпација станарите автоматски се спречени да си го откупат дворното место што и' припаѓа на зградата.

Поплаките на граѓаните се упатени директно на адреса на Општина Чаир и до градоначалникот Изет Меџити, бидејќи, според нив, тие не смеат да дозволат бесправно ширење на кафеаната „Скупи“ и на ресторанот „Тиволи“. Станарите сметаат дека Општината не треба да им даде право на дуќанџиите да градат и да ги прошируваат локалите на земјиште што и' припаѓа на зградата.

Со градежните зафати што ги преземаат газдите за реновирање на дуќаните се уриваат потпорните столбови на зградата. Ова го прават со цел кафеаните да добијат во висина и во ширина, поради што го поплочуваат и го заградуваат зеленилото, па си прават тераси. На тој начин се затвора пристапот до станбената зграда, па станарите, како што велат, биле принудени со свои пари да направат посебен влез за да можат непречено да си доаѓаат дома. Но, и покрај тоа налето пристапот им го блокираат масите и столовите од ресторанот „Тиволи“.

„Газдата на овој ресторан копаше под целата тераса од првиот кат, проширувајќи го долниот дел од ресторанот, при што ги поткопа и темелите на зградата. Му пречеа во проширувањето и притоа не размислуваше за нашата безбедност, туку за својата материјална корист. Немоќни сме пред Општината Чаир и не можеме ништо да постигнеме. Преку овластен адвокат, со препорачано писмо, испративме петиција потпишана од сите станари. Во неа спомнавме дека ни е загрозена безбедноста поради бесправното градење и копање од страна на сопствениците на ресторанот ’Тиволи‘ и кафеаната ’Скупи‘. Но, од Чаир се' уште немаме никакво известување“, објасни еден станар, кој сакаше да остане анонимен.

„Нема ништо спорно во проширувањето на ресторанот и на кафеаната, бидејќи нивните сопственици уредно се обратија до Општината за добивање дозволи. Реакциите на станарите не се наместо. Тие не може да живеат во центар на град, а да очекуваат да имаат комодитет како да живеат во Топанско Поле. Сопствениците на дуќаните не се мои блиски луѓе и обвинувањата на станарите се неосновани“, вели градоначалникот на Чаир, Изет Меџити.

Енвер Кадри, сопственик на ресторанот „Тиволи“, тврди дека ги поседува сите дозволи, па дури и дозвола од Градот за поставување урбана опрема, бидејќи и тој е дел од таа станбената зграда. „Зарем би дозволил мојот реномиран ресторан, кој неодамна доби награда за еден од најдобрите во Скопје, да работи нелегално“, вели тој.

Со газдата на кафеаната „Скупи“ не успеавме да го исконтактираме. За кафеаната нема телефонски број во Службата за информации.