Советот на Град Скопје на вчерашната 55-та седница го донесе нацрт-буџетот на Град Скопје за 2012 година, кој ќе изнесува 6.486.484.000 денари.

Советот ги усвои и Извештајот за извршување на буџетот на Град Скопје за 2011 година за периодот од 01 јануари до 30 септември годинава, Одлуката за измена на распоредот на средствата во буџетот на Град Скопје за 2011 година, како и Планот на програми за развој за периодот 2012-2014 година.

На вчерашната седница Советот одобри Град Скопје да земе финансиско учество во повеќе проекти, кои ќе бидат реализирани со другите скопски општини.

Советот одобри воспоставување соработка помеѓу Град Скопје и општина Центар заради реализација на проектот за изградба на улица околу стадионот „Филип Втори Македонски“, со што градот ќе учествува со 12 миниони денари. Советот одобри и воспоставување соработка помеѓу Град Скопје и општина Бутел за реализација на фекална канализација во село Љубанци. Град Скопје во овој проект ќе земе финансиско учество во висина од 5 миниони денари. Воспоставена е соработка помеѓу Град Скопје и општината Гази Баба, за изградба на тротоари на улицата „Јани Лукровски“ и за санација на еден крак од оваа улица. Градот ќе земе финансиско учество во висина од 3,5 милиони денари. Воспоставена е соработка и со општина Чаир, за санација на улицата „Благоја Паровиќ“, за што ќе одвои 3,5 милиони денари.

На вчерашната седница Советот на Град Скопје донесе одлука за промена на цената на автобускиот превоз во јавното претпријатие ЈСП „Скопје“. Билетите во градската зона поскапуваат за пет денари, или цената на купен билет во билетарница од 25 денари се зголемува на 30, а билетите купени во возило од 30 се зголемуваат на 35 денари.

Цената на билетите за приградските линии се изедначува на 35 денари, додека билетот за 10 возења се менува од 230 на 250 денари за градските и од 280 на 300 денари за приградските линии. Дополнително, донесена е и одлука со која на 39 општини ќе им бидат донирани 40 од старите автобуси на ЈСП - Скопје.

Советот ги усвои и извештаите за работа на јавните установи од областа на културата за 2010 година.

Цената на автобуските билети кои се продаваат кај возачот се покачуваат од 30 на 35 денари, оние кои се купени во билетара од 25 ќе се покачат на 30 денари, а билетот за 10 возења кој досега изнесуваше 230 ќе чини 250 денари.

За приградските линии, билетот за 10 возења од 280 на 300 денари, а цената на месечни билети, останува иста.

За месечните билети за ученици и пензионери ќе има само една зона и ќе бидат со универзална цена од 1.050 денари. Разликата е таа што се предлага да важат и за градски и за приградски превоз, а не како досега кога беа поделени на маркици за повеќе зони.

- Главна причина е поскапувањето на цената на нафтата. Во 2009 година во ноември, цената на дизел горивото изнесуваше окoлу 50 денари, денес е 68 денари, а трошоците за нафта се движат од 30 до 35 проценти од трошоците на ЈСП. Како друга причина за покачување на цената е одржувањето на новите автобуси и санирањето на штетите од вандалското однесување на несовесните граѓани, потенцира директорот на ЈСП Мишо Николов.

Со зголемување на цените на автобуските билети, Николов очекува покачување на приходот за 5 отсто.

Предлог-барањето веќе е доставено до Советот на Град Скопје и денес ќе се одлучува дали аргументите на Управниот одбор на ЈСП за поскапување на цената на јавниот превоз се оправдани или не.

Извор: курир