Трамвај Скопје ( Лесна железница / LRT )

Италијанска корпорација го доби тендерот за трамвајот

За 12 дена ќе биде дефинитивно потпишан договорот со Италијанците

Деспина Трајковска

Корпорацијата предводена од италијанските фирми „Џанкарло Боно - Долџаго“ и „ Аксиома Десин“, а во која се и бугарската „Проџект билдинг оф транспорт системс“ и македонската „МАК 2000“, е избрана за најповолен понудувач на тендерот за изработка на основниот проект за изградба на трамвајскиот систем во Скопје. Од Градот потврдуваат дека вчера завршиле со евалуацијата на тендерот и за исходот веќе се доставени известувања до другите фирми-учеснички. За 12 дена ќе биде познато дали италијанската корпорација дефинитивно ќе го потпише договорот за изработка на основниот проект, период во кој другите кандидати на тендерот ќе можат да поднесат жалби. Од Градот велат корпорацијата доставила најдобри финансиски услови, што било пресудно при изборот.

„Нивната понуда достигна околу 470.000 евра, што е речиси за 200 илјади помалку од другите. Иако шпанската фирма имаше подобра понуда во однос на техничкиот квалитет и иновациите, сепак, нивната финансиска конструкција беше многу повисока, околу 630.000 евра“, објаснуваат од Градот и потенцираат дека веднаш по потпишувањето на договорот, избраната фирма ќе треба во рок од два месеца да го изработи проектот за депото. Не е исклучена можноста, тој рок да биде скратен, за градежните активности да започнат пред Нова година.

Паралелно со тоа, фирмата ќе треба да го изработи и проектот за првите три километри од трамвајската траса од Ново Лисиче до Центар, а веднаш потоа ќе се распише тендерот за избор на изведувач.

Инаку, на меѓународниот тендер се пријавија четири фирми. Освен италијанската корпорација, учествуваа и германската компанија „Планунгсбуро“, австриската ВЦЕ и шпанската компанија „Идом инженерија“.