Уште еден само

Едно прашање.

Дали знае некој, колку е просечната ширина на столчињата во градски автобуси?

ДЕСЕТИНА ГРАЃАНИ ЗАЛОЖНИЦИ НА НЕСОВЕСЕН возаЧ на автобус
Шофер однел патници на технички преглед

Директорот на приватното претпријатие „Слобода превоз“, Ленин Јовановски, беше на пат и рече дека не е запознаен со немилата случка, но ја осуди ваквата постапка појаснувајќи дека ќе бидат преземени соодветни репресивни мерки

Десетина патници два часа биле заложници и цел на изживување на несовесен возач на приватен автобус со број „22“. Тие уредно си платиле карта на последната станица во Волково, но наместо до саканата дестинација, присилно завршиле на технички преглед во Ѓорче Петров. Биле внатре и додека автобусот бил цел на техничка контрола затоа што возачот ги затворил вратите.

Несекојдневниот настан се случил кога полиција му наредила на возачот да го однесе автобусот на технички преглед во најблиската станица. Но наместо да ја послуша препораката на полицијата и претходно да ги симне патниците, тој возел со нив, а застанувал и собирал други на попатните станици. Случката ја раскажува патник кој ја доживеал целата голгота.

- Мислевме дека ќе н` симне попат, но тоа не се случи. Од друга страна, возеше многу бавно, пешаците се движеа побрзо од него. Кога стасавме во населбата Даме Груев, кај Новоселски Пат, патниците почнаа да реагираат за темпото на возење и сакавме да ни дозволи да се симнеме. Но, возачот ни ги затвори вратите, кои претходно беа отворени за ладење, и не ни дозволи такво нешто - раскажува револтиран патник кој сакаше да остане анонимен.

Возачот им рекол на патниците дека сите заедно ќе одат на технички преглед. Очевидецот раскажува дека тоа предизвикало голем револт кај сите, особено поради фактот дека било пладне, а притоа голема жештина. Но тој без да се обѕрне на нивните поплаки, скршнал од вообичаената маршрута на линијата „22“ кај надвозникот во Ѓорче Петров и возел с` до станицата за технички преглед. - Цело време бевме во автобусот. Речиси 20 минути додека возилото не помина низ сите фази. Преглед на кочници, па напред, назад, се трускавме како компири, додека автобусот минуваше низ справите. И тогаш се побунивме, но бесполезно. На прашањето зошто ова ни го прави, возачот без грижа на совест одговори: „Со вас побрзо ќе го минам прегледот“.

Директорот на приватното претпријатие за јавен градски превоз „Слобода превоз“, Ленин Јовановски, кој беше на пат во Русија, во телефонскиот разговор одговори дека не е запознаен со случајот, но ја осуди ваквата постапка.

- Возачот не смеел да постапи така. Требало и полицијата да му укаже на тоа. Кога ќе се вратам ќе го разгледам случајот и ќе бидат преземени соодветни репресивни мерки, во краен случај на возачот нема да му биде издаден патен налог да сообраќа - изјави Јовановски.

Од МВР велат дека во вакви случаи законите не предвидуваат казни. Според нив, патниците требало да поднесат поплака до полициската станица во Ѓорче Петров.

- На патниците им е скратена слободата на движење. Имале основа да го пријават возачот или во полициска станица или во претпријатието во чии рамки работи превозникот. Дури тогаш тој ќе биде повикан на информативен разговор и ќе му биде укажано на тоа. Во секој случај, при дефект на автобусот или при ваков случај, шоферот треба патниците да ги остави на најблиската автобуска станица, а не да се изживува со нив - рече Лиза Бендевска, портпарол во Секретаријатот за внатрешни работи - Скопје.