Милијарда евра загуба поради неизградената железница

Земјите од регионот годишно губат најмалку милијарда евра поради недоизградената транспортна мрежа на Коридорот 8, кој се протега од бугарското пристаниште Бургас преку Скопје до градот Валона во Албанија. Ова се процените на бугарските власти, кои во соработка со македонските и албанските колеги во изминатите десетина години потпишаа повеќе меѓународни договори за изградба на овој коридор, како и за обезбедување пари од европските фондови.

И додека Бугарија во последниве години го интензивира довршувањето на нејзиниот дел од патната и железничката мрежа, Македонија повеќе од пет години тапка во место. По 15-годишно градење на железницата и потрошени повеќе од сто милиони евра, нашата земја единствено успеа да истрасира земјен дел кој стасува некаде пред Крива Паланка и неколку железнички мостови кои веќе имаат оштетувања.

Приоритет за македонските власти, според нивните најави, е довршувањето на железничката пруга кон Бугарија, односно изградба на уште 89 километри пруга. Но, со оглед на планираната динамика на градежните активности, железничкото поврзување со источниот сосед нема да биде можно ни во следните пет години. И изградбата на делницата од Кичево до Албанија, во должина од 66 километри нема изгледи во скоро време да биде готова бидејќи се' уште е во фаза на студија. Со тоа се намалува можноста за брзо железничко поврзување на Црното Море со Јадранското, делница што е особено значајна за трговската размена меѓу трите земји.

Според планираните активности на македонското Министерство за транспорт и врски, до септември годинава треба да биде изработен главен проект за делницата од Крива Паланка до Деве Баир. Откако ќе се обезбедат пари за изградбата, која ќе чини околу 157 милиони евра, процените се дека довршувањето на пругата кон Бугарија ќе заврши за четири години.

- При изработката на главниот проект разработени се неколку опции на траса поради планинскиот терен. Предвидена е изградба на неколку тунели и мостови кои ја зголемуваат цената на целиот проект. Стручните тимови ќе ја изберат онаа траса што ќе биде оптимална во технички и финансиски поглед. По обезбедување на парите и изборот на градежна фирма ќе почнат градежните работи - велат од Министерството за транспорт и врски.

Оттаму објаснуваат дека во вкупната сума е вклучен и надомест за штетите што ги претрпеа градежните фирми поради прекинот на работите на пругата пред пет години. Бугарските власти објаснуваат дека за нив приоритетна е изградбата на железничко-патната делница на трасата од Бургас до Дура, за што ќе се искористат пари од фондовите на Европската Унија, како и пари обезбедени по пат на јавно-приватно партнерство.

- Од бугарска страна, од Ѓуешево до македонската граница има 2,5 километра без железничка линија, но тоа е најмалата пречка за изградбата на коридорот. Во изминатиов период склучивме повеќе договори за успешно функционирање на овој коридор. Меѓу другото, за годинава е предвиден ремонт на железничката пруга на делниците Варна-Софија и Бургас-Софија, со што ќе се зголеми брзината на движење на возовите. Во процес на проектирање е магистралата Радомир -Ќустендил што ќе ја поврзува Бугарија со Македонија - вели Даниел Неделков, од извршната агенција „Железничка управа“ од Бугарија. Процените се дека комплетирањето на Коридорот 8 ќе чини 2,7 милијарда евра, но засега не може да се даде точен рок за довршување на сите работи. Само за изградба на железницата кон Бугарија Македонија досега потроши околу 2,2 милиона евра.

ИНФО-Пруга кон Бугарија

Земјите од регионот годишно губат најмалку една милијарда евра поради неизградениот Коридор 8, кој треба да ги поврзе Црното и Јадранското Море. Приоритет за македонските власти е довршувањето на железничката пруга кон Бугарија, односно изградба на уште 89 километри пруга. Но, со оглед на планираната динамика на градежните активности, железничкото поврзување со источниот сосед нема да биде можно во следните пет години.