Патна мрежа (општо)

Мостот на Брегалница во општина Карбинци пред паѓање

Штип – Општина Карбинци е поврзана со остатокот на светот преку единствениот мост на реката Брегалница. Друг начин да се дојде до малата рурална општина е да се врти преку Штип и да се поминат дополнителни 30 километри пат во двете насоки. Тоа им прави посебни проблеми на бизнисмените кои за свои потреби користат камиони, но и на автобуските превозници за кои постои забрана за минување преку опасниот мост.

Стручни лица имаат констатирано тешко оштетување на еден од столбовите на мостот, по што сообраќајната полиција постави знаци со кои се забранува минувањето преку мостот на секакви товарни возила, на минибуси и на автобуси. Сепак, луѓето кои секојдневно го користат овој единствен премин ги имаат тргнато предупредувачките табли и на сопствен ризик минуваат преку мостот.

Градоначалникот на општина Карбинци, Зоран Минов, вели дека се работи за еден од најголемите проблеми со кои се соочува Општината.

„Мостот прави проблеми пред се' на бизнисот кој во нашата општина е во развој. Бидејќи преку него не можат да се превезуваат работници, а фирмите не смеат да ги транспортираат своите производи до крајните дестинации, па нивните товарни возила мора да вртат преку Штип. Ние изработивме проект за санација на мостот и го доставивме до Агенцијата за рурален развој. Очекуваме позитивно решение веќе во текот на идниот месец. Според проектот, санацијата би чинела околу 200.000 евра, но мостот покрај тоа што ќе биде стабилизиран и безбеден за секаков вид сообраќај, ќе има и тротоари од двете страни“, рече Минов.

Повеќе на линкот http://www.utrinski.com.mk/?ItemID=D3A3837F7CD5D1479CD2EC3018D0E655