Тајни договори за амбиенталните слики за Археолошкиот музеј

Договорот за набавка и изработка на амбиенталните слики за Археолошкиот музеј, до кој дојде „Нова Македонија“, како што стои во него, е „од доверлив карактер“ и „не смее да се открива пред никого“. Освен тоа, склучен е на сума од околу 4.000 евра за едно дело. Засега се нарачани 40 амбиентални слики, но според Кузман, ќе има уште една серија од околу 5-60 слики. Ако се вкупно повеќе од сто слики, и тие чинат приближно по 4.000 евра, тоа се речиси половина милион евра - потрошени само за декор!

ОКОЛУ ПОЛОВИНА МИЛИОН ЕВРА САМО ЗА ДЕКОР

„Овој договор е од доверлив карактер и како таков ќе се чува меѓу договорените страни, а без претходна писмена согласност од другата страна, нема да се открива ниту делумно ниту целосно пред никого“, вака гласи членот 20 од Договорот за набавка и изработка на амбиенталните слики што ќе го украсуваат Археолошкиот музеј што се гради на левиот брег на Вардар. Договорот до кој успеа да дојде редакцијата на „Нова Македонија“ е склучен помеѓу Паско Кузман, директорот на Управата за заштита на културно наследство, како нарачател и автор чие име во примерокот на овој договор е покриено.

Конкретниот договор е склучен на сума од околу 4.000 евра за едно дело. Засега се нарачани 40 амбиентални слики, но според Кузман, ќе има уште една серија од околу 5-60 слики. Ако се вкупно повеќе од сто слики, и тие чинат приближно по 4.000 евра, тоа се речиси половина милион евра.
Тајноста на договорите, тврди Кузман, не е за да се скрие нешто од јавноста, туку поради конкуренцијата помеѓу уметниците која, според него, може да доведе до непријатни ситуации.

- Така е според Законот за јавни набавки, ние ништо не криеме. Навистина не знам зошто така стои во договорот, но тоа претпоставувам е преземено од законските прописи. Веројатно договорот е доверлив за да се избегнат реакции. Ние не се плашиме од народот, туку за да ги заштитиме уметниците. Тие се јадат меѓу себе, има натпревар меѓу нив - вели Кузман.

Според него, тука не станува збор за јавен конкурс, туку за јавна набавка по пат на договарање.
- Заради конкуренцијата не смееме да објавуваме суми. Ние си имаме определено до која сума смееме да одиме. Па така, кога некои од украинските или руските уметници побараа големи хонорари, по 30-40 илјади евра за дело, ги одбивме. Не сме во можност толку пари да исплатиме. Но ни нашата граница не смее уметниците да ја знаат, па во тие рамки да калкулираат. Затоа тие суми се држат во тајност - вели Кузман.

Тој вели дека хонорарите за секоја посебна слика ќе бидат различни, дека сумата од 4.000 евра, до која дојде „Нова Македонија“, не се однесува на сите нарачани дела. Лани Кузман не даде информација колкав ќе биде буџетот за ова намена и дека ќе се знае кога уметниците ќе ги соопштат своите хонорари. Иако дел од договорите се потпишани, буџетот не се соопштува.

- Засега имаме нарачано 40 амбиентални слики, но ќе следува уште една серија од 5-60. Тие слики всушност ќе ги претставуваат предметите што ќе бидат изложени. Тие предмети ќе бидат насликани во некаков амбиент, на пример, како се користеле и сл. Така посетителите ќе можат да го видат предметот во витрина и сликата која ќе прикажува како некогаш се употребувал - вели Кузман.

Меѓу уметниците што ќе ги изработат амбиенталните слики има руски, украински, бугарски автори, но и македонски - само два-тројца.

- Толку наши уметници се пријавија. Ние побаравме од ДЛУМ да ни предложат автори што би можеле да ги изработат овие слики, и тие ни предложија само толку, мислам дека меѓу домашните уметници се Газанфер Бајрам, Коле Манев и не можат да се сетам кои други. Изгледа нашите уметници се зафатени со работа за Музејот на ВМРО - вели Кузман.

Од Друштвото на ликовни уметници, пак, пред неколку месеци потврдија дека дале листа со околу 20 македонски уметници, меѓу кои и Милош Коџоман, Синиша Кашавелски, Рубенс Корубин, Новица Трајковски, Гоце Божурски, Атанас Ботев, Павле Кузмановски, но тогаш не се знаеше кој од нив добил покана за учество на конкурсот.

Археолошкиот музеј е еден од објектите на проектот „Скопје 2014“, каде што ќе биде претставено археолошкото богатство на Македонија, а таму ќе се удомат и Уставниот суд и Архивот на Македонија.