Пешачки зони и помали плоштади (општо)

Кафеанџиите бараат да го користат кејот преку цела година, а не само шест месеци

Аларова јавно ги поддржа барањата, бидејќи тоа ќе и' донесе на Општината дополнителни приходи

ДЕСПИНА ТРАЈКОВСКА

Кафеанџиите на кејот „13 Ноември“ не отстапуваат од намерата да издејствуваат користење на пешачката зона преку цела година. Во зима тоа би го извеле со подвижни стакленици, а во лето би функционирале како и досега. Оваа нивна идеја, што беше актуелна и лани пред 1 април кога официјално почнува летната шема на кафулињата, повторно беше јавно презентирана на последната седница на Советот на Општина Центар. Иван Димитровски, сопственик на пицеријата „Ања“, побара дозвола од градоначалничката Виолета Аларова, потенцирајќи дека од тоа ќе имаат добивка и Општината и граѓаните, на кои кејот им е омилено место за релаксација.

„Зошто не можеме да го користиме кејот преку целата година? Вие ќе собирате дополнителни приходи, граѓаните ќе имаат можност да уживаат во текот на сите 12 месеци, а ќе се исполнат и нашите барања. Нема да има потреба од уривања, па наместо непријатели - ќе станеме пријатели. Не измислуваме топла вода, таква шема веќе проверено функционира во повеќе европски градови“, потенцираше Димитровски, кој крајно некултурно им се обрати на новинарите и побара кафулињата да не ги нарекуваат најлон кафулиња, бидејќи всушност, локалите биле заградени со скап ПВЦ материјал кој чини 25 евра квадрат. Убедувајќи дека кејот ќе биде личен, Димитровски на советниците и на новинарите иронично им понуди прошетка до Солун за да добијат претстава дека барањето за годишно користење на кејот е сосема оправдано.

Кратко и јасно општинарите објаснија дека крајниот збор е во Градот, бидејќи Правилникот за користење јавна површина кој предвидува летните тераси да работат шест месеци, почнувајќи од 1 април, е устав за општинските правилници. Но, и покрај тоа, кафеанџиите добија јавна поддршка од градоначалничката Аларова. „Мислите ние не сакаме да ви помогнеме, ем вие ќе бидете задоволни, ем ние ќе земеме дополнителни приходи. Ете колку ние како општина, вие како кафеанџии и граѓаните кои го сакаат кејот за забава, губиме од небулозните одлуки на Градот. Поведете иницијатива за измена на Правилникот и јас прва ќе ве поддржам и ќе ви ставам потпис“, беше категорична Аларова, која смета дека Скопје ги заслужува кафеаните преку целата година, имајќи ја предвид климата што владее на ова подрачје.

Од Градот вчера немаа конкретен став во врска со старо-новото барање на кафеанџиите. Посочија дека лани била издејствувана измена на Правилникот кој стасал само до нацрт-верзија. Имено, градските власти во нацртот предвиделе функционирање на летните тераси преку целата година, но поради несогласувањата на некои општини кои имале спротивни мислења и во однос на поделбата на парите собрани од комуналната такса, тој не поминал. За новонастаната ситуација од Градот не можат да дадат конкретен одговор, бидејќи, поради измените на Законот за градење, најверојатно, наскоро ќе треба да се менува постојниот Правилник. Посочуваат дека неодамна бил усвоен амандман кој предвидува за површините за чие одржување се задолжени градските власти дозволите да ги издава Градот. Од тие причини постојниот Правилник ќе треба да се менува, бидејќи сега за кејот дозволите ги издава Општина Центар, иако станува збор за градска јавна површина. Надлежните се надеваат дека законските измени наскоро ќе бидат усвоени и Градот да има доволно време да го изготви новиот правилник за подготвено да се пречекала летната шема на кафулињата.

Во случај барањето на кафеанџиите да биде прифатено од Градот, Општината ќе треба да го менува постојниот ДУП за кејот, бидејќи тој не предвидува доградба на локалите, односно нивно застаклување. Тоа би значело изведување градежни активности, што пак, не е во согласност со Генералниот урбанистички план. Лани, кога кафеанџиите ја промовираа идејата за користење на кејот преку целата година, беше објаснето дека застаклувањето би се извршило со калено стакло и алуминиумски профили поставени на подвижни шини, со можност за нивна демонтажа во секое време. Тие предложија монтажните стакленици да се наоѓаат во првата зона од локалите, веднаш до излозите, а меѓу локалите да постои т.н. тампон-зона која би се уредила со зеленило. На просторот, пак, во линија на трите излези од ГТЦ кон кејот, за разлика од сега, би се забранило поставување инвентар.

Инаку, новонастанатата ситуација во ниту еден момент нема да изврши никакви промени во однос на цената на користење на јавните површини која е проектирана со Законот за комунална такса. Кафеанџиите и понатаму дневно за еден квадратен метар јавна површина ќе плаќаат само 15 денари.