Патна мрежа (општо)

Ниту еден од финансиските извештаи на Македонија пат во време кога со ова јавно претпријатие директорувал Горан Стојковиќ не е позитивен. Анализирајќи ја работата на претпријатието од 2008 до 2011 година, Државниот завод за ревизија констатира низа неправилности.

Утврдено е дека воопшто немало контрола врз приходите и расходите, набавките и плаќањата, но и врз тоа како се доделуваат договорите за јавни набавки. Иако е намалена ликвидноста на претпријатието, ревизорите забележаа дека констатно се зголемуваат расходите за штети, камати и судски трошоци, како и за долгови по основ на ДДВ. Иако е веќе и јавно познато, се забележува и дека наплатата на патарина е крајно злоупотребена, за што во тек се судски процеси.

Државниот завод за ревизија утврди и многу активности во претпријатието спротивни на законот, како на пример, покривањето на негативните финансиски извештаи и начинот на којшто Македонија пат добивала нафта од државните резерви.

„Македонија пат до 2010 година во трговските книги ја покрива загубата од 12 милиони евра, направена од 2006 до 2010 година, врз основа на акти без запазена хронологија. Уште од 2009 година на Македонија пат му беше одобрена нафта од државните резерви без надомест. Од 2009 година биле одобрени 2.335 илјади литри нафта во вредност од 1,5 милиони евра, што не е во согласност со законот. Исто така, менаџментот, во отсуство на реални приходи и во услови на загуба, прикажувало нереални приходи од трети лица за да прикаже позитивен извештај. На пример, планирани биле шест милиони евра, а биле остварени 500.000 евра“, пишува во извештајот на Државниот завод за ревизија.

Иако речиси 90% од приходите на Македонија пат се пари што Агенцијата за државни патишта ги уплаќа од извршени работи, сепак, ревизорите утврдија дека не постоеле интерни контроли за да се види дали сите пари завршуваат во претпријатието. Затоа, ревизорите препорачуваат воведување автоматски систем за наплата на патарина.

Констатирани се и низа нерегуларности во делот на јавните набавки. Иако Македонија пат работи со загуба, во многу од јавните набавки менаџментот ставал рок за плаќање до 15 дена, кој не биле почитуван. Од ист доставувач во ист период се вршеле набавки по ист производ, но со различни договори, што фрлало сомнеж за незаконското трошење пари, а не се користеле ниту електронски аукции. Вкупно 3,8 милиони евра склучени договори преку јавни набавки, според ревизорот, се спроведени без обезбедување фер конкуренција и еднаква положба на понудувачите.

„Не се извршени објави на две постапки за доделување договор за јавна набавка, набавка на индустриска сол за патиштата, кои без вклучен ДДВ се проценети на 500.000 евра. Не е презентирана банкарска гаранција за квалитетно извршување на договорите, не се доставува извештај за секој склучен договор за да се објавуват на интернет-станицата на Бирото за јавни набавки“, пишува во извештајот на ревизорот.

Ревизорите предупредуваат дека Македонија пат ги крши Законот за ДДВ и Законот за плаќање на долговите на рати, со кој на јавните претпријатија им се дозволи да ги плаќаат долговите кон УЈП на рати. За данок Македонија пат должела 758.000 евра до 2010 година, кои треба да бидат платени до февруари 2013 година. Но, заклучно со 2011 година, поради неплаќање во континуитет се собрале вкупно 3,2 милиони евра долг кон УЈП.

http://www.kapital.mk/mk/dneven_vesnik/84054/revizijata_otkri_deka_nema_kontrola_vrz_parite_vo_makedonija_pat.aspx?iId=2737